孖妹S檔案：蚊型券商「缸」湖求生記
「流淚眼望流淚眼，談十晚又談十晚，經已說到眼腫有如雞蛋……」唉，孖妹都唔想散播負能量，但過去一個月氹番啲證券行朋友都氹到我哋阿愁上身，皆因舊年證券行生意難撈，A組行淨盈利跌足九成，C組都跌咗八成，本身以細經紀行為主嘅C組行已經冇乜肉食（口架）啦，認真該煨囉！之不過，有人流淚、有人歡欣，我哋想請C組行朋友去海邊踢浪放鬆吓之際，發覺當中有啲人仲精靈過我哋，呢個行頭認真一面天堂一面地獄囉。
2012年轉型：密做上市客 少經紀盤
李：鼎成證券總經理 李易明（Calvin）
彩兒：聯交所參與者入面，港交所會利用每月成交額分佢做A、B、C組，成交頭14位嘅券商係A組，15至65位係B組，第65位之後就係C組喇，我知道你做緊嗰間證券行都係C組嚟（口架）喎，點解你成日蓮子蓉咁嘅面口？唔通你真係可以咁阿Q精神？辛苦晒你喇……
李：鼎成雖然以成交量計係C組行，但公司喺二○一二年開始就轉型，做埋資產管理收表現費、同埋包銷等等業務，依家有八成生意係來自配售、IPO、供股等上市公司業務，一成至一成半係來自資產管理，剩低嘅先係經紀業務，依家公司經紀係唔多過10個人。話你知吖，成個行頭睇，就算港股大市成交過千億元都好，好大部分都係來自於電腦盤、機構投資者交易，而唔係來自經紀交易。
百萬年薪挖猛將跑數
李：不過，轉型至主力做搞配售、IPO呢類業務，人脈就自然好緊要，如果係搵Deal搵得叻嘅從業員，我哋係好積極挖角，一單Deal閒閒哋都集資過千萬元，每單Deal起碼可以賺2至3%佣金，所以叻嘅從業員年薪會係過百萬元。
Kitty：原來你已經入咗行廿年，嘩，你咁就洩露咗你年齡嘅秘密喇。
李：我九七年入行，當時大牛市，有好多證券行開始推網上交易，加上○二年取消咗最低佣金之後，證券行除非有特別服務，又或者係投資建議特別準，如果唔係就一定行鬥平條路，除咗同行競爭之外，二○○○年打後仲愈多銀行加入證券業務戰團，搞埋啲「一世免佣」計劃，經紀行家都呻，客人其實係好鍾意拎咗經紀嘅投資意見之後，就喺經紀行買少少，喺銀行或平佣券商就買多多，唉，皆因喺證券行買貨仲要入錢落戶口，唔及得銀行方便嘛！港股實行T+2交收制，唔少經紀會畀彈性客戶，先買貨、後入錢，呢樣係佢哋其中一個優勢，但係港股爆升期愈來愈短命，去到一五年大時代時就只得2至3個月，經紀面對行業嘅競爭點都多過優勢啦。
競爭大 個別賣牌退休
李：如果C組證券行唔轉型、建立網上交易平台嘅話，就真係世界難撈，若然齋做經紀業務，又可以收支平衡就已經好叻，你知香港地租金同人工幾貴啦？依家又多內地資金嚟香港撈金融，例如私募基金咁，唔少老牌C組行老闆寧願賣咗個證券牌退休。
過檔中資：財雄勢大 軟硬件優秀
劉：盛源證券高端客戶部聯席主管 劉偉洪（Ray）
彩兒：你依家過咗檔中資投行，以前都做過證券行，老老實實係咪好惡做先？
劉：我之前係做華資行嘅，都做咗差唔多十年，都可以話係見證呢行嘅變化，見到好多都撈得麻麻，最後畀中資行收購。你諗吓，中資行佣又平，IT技術又強，點夠人爭。當中最陰公梗係C組行啦，淨係得經紀業務，規模又細，根本冇咁多資金用嚟搞網或者搞App，就算搞完，又唔夠人哋快，唔夠人哋好用，依家個個都喺網上落盤，就算連師奶都識用電腦。你話C組行點玩落去呀？
令業務多元或等併購
Kitty：咁C組行咪死梗，有乜法子解救先？
劉：C組行好難做落去呀，個市成交又少咗，又多咗人轉網上落盤，齋做經紀業務認真閉翳，一定要諗方法轉型，諗多啲收入來源。例如做吓財富管理，反正你都有班客，趁流失晒之前，不如賣吓基金，又或者拍住大少少嘅證券行一齊做IPO。因為融資Size係1億至5億元，上市公司多數係搵細行做，唔會搵歐美投行，呢度都有肉食，我哋公司平均每個月做一單，一年計落都最少有二千幾萬元盈利。所以結論係，你要諗辦法盡量將個業務多元化，再唔係就疊埋心水等畀人收購喇。
彩兒：咁你依家過咗檔中資啦，成日話有大水喉射住，細細聲話我知，係咪好做好多先？
劉：有得揀梗係揀中資啦！以舊年市況嚟講，華資行花紅可能得一至兩個月，但中資行花紅分分鐘有四個月咁多。而且中資行話晒有大水喉射住，啲老細本身有Network，同好多內地地方企業有關係，雖然未去到話央企咁堅，不過都有唔少地級市國企。你諗吓，成個中國咁大，有十幾個省，每個省又有十幾個市，條數幾襟計。
華資行App跑輸負評多
劉：再講，中資行財雄勢大，夠力去搶Market Share，一嚟就免佣或者以極低佣金去吸客，賺晒口碑，而且IT又勁，唔好話我賣廣告呀。市面上同樣係App，華資行某啲App真係麻麻哋，成日畀人彈，相反啲中資行嘅App真係又快又好用，你話C組行點夠佢哋爭？
華資行：5蚊佣搶客 搞IT皮費輕
溫：雅利多證券高級副總裁 溫惠晴
彩兒：你哋開業唔算太耐，莫非證券呢行仲有肉食？
溫：係呀，其實我哋喺一四年先開業。我哋係C組華資行，現時係靠低佣金吸客，最平做到5蚊，我哋仲鼓勵啲客自己用電腦落盤，大家都慳番啲成本吖嘛，可能我哋個App啲字都幾大啦，就算上咗年紀嘅人都睇到，但依家仲打電話落盤嘅客我諗少過5個，有少少似「堂食」同「外賣」嘅分別。至於點解咁勇去做？因為有熱誠囉，我哋做咗咁多年，最熟都係呢瓣，其他嘢未必在行。
Kitty：搞系統呀網呀，會唔會技術好高同成本好大？
溫：依家係要靠電腦搵食，好好彩，我哋搵到個唔錯嘅服務系統供應商，每個月都係收番我哋幾萬蚊，乜都包晒，所以成本唔算話太高，我哋都唔需要特登請人去搞IT嘢。而且未來科技參與一定會愈嚟愈多，證監會都話想遲啲登入系統時要雙重認證啦。
瞓身賺佣兼包銷新股
彩兒：你哋搞網，競爭大唔大？齋靠佣金夠做咩？
溫：競爭方面咪各有各做囉，大家有唔同「角度」，有啲可能專做上咗年紀嘅客，有啲可能搵後生仔，有啲可能專做高頻交易，有啲甚至撈埋其他業務，都係各師各法，同埋惟有量入為出囉，暫時我哋都算做得OK，市佔率有提升過，我哋咩客都有，依家主要收入係佣金，同埋包銷新股份，暫時兩瓣都叫有錢賺咁囉。
Kitty、彩兒