五窮六絕，當然是近期比較熱門的訪問話題。自己不擔心市況會掉頭大跌，但在強股唔敢追，弱股唔想買的環境中，最怕是變成你眼望我眼，低成交窄波幅之中虛耗歲月，另一種山窮水盡模式。股災快上快落，絕對好炒，反而市況一路橫行，心跳還要愈來愈弱，才是噩夢。
自己好怕接受訪問，實在無辦法像當紅股評人般七情上面，將一場港超聯比賽講到有如歐聯決賽一樣。近期開始愈來愈多一鋪清袋的股災警告，因為連升幾個月，市況水漲船高之後，如果不來一次大跌，已經交代不了，預測帶有極高的感情成分，可惜現實中已經不似會有幾多個生關死劫。
最正路的答案，當然是不上不落，或者是舉步維艱式慢慢升。可是對答重複得太多次，便會令到自己愈來愈固執，失去了想像力。
假如好友繼續控制大局，升勢有一段忽然急劇加速，恒指直撲26,000點燃起街外人熱情，亦是其中一個正路的發展。自我催眠以為是一世上落市，就有機會走失一個泡沫中賺大錢的機遇。
在這種預期坐和望贏的環境中，應該關注的並非是會升幾多，而是要坐幾多貨，跌到甚麼水平就需要放棄認輸。投資者的工作，只是管理好風險，最終回報的高低，在於市場到底會幾傻，並非控制之內的事情。所以對於目標的預測，有個大約概念便可以。
投資和務農十分近似，努力耕耘之後，收成有幾多是睇天，太過緊張估得太多，只是本末倒置，徒添煩惱而已。
豐盛金融資產管理董事 黃國英（作者為註冊持牌人士）