Market Insight：汽車股獲北水力撐

重貨股廣汽集團（02238）揸咗5.23億股，相當於發行股本23.6%，長城汽車（02333）揸咗21.7%，吉利汽車（00175）揸11%、北京汽車（01958）揸10%。

廣汽季績有驚喜

除咗股聖彼德林治的投資理念，專揀能夠朝見口晚見面，經營理想的企業品牌之外，更重要依家A股死死吓，內地樓市唔畀炒，內地資金睇中阿爺必定頂住個消費市場的盲點，今年下半年車市點都唔會太差。

假期前廣汽出首季業績，有點喜出望外，股東應佔盈利38.2億元人民幣，按年勁升98.6%，期內營業額168.8億元人民幣，按年升66.4%。

外資行都係估緊廣汽全年賺80億至85億元人民幣，依家一季已經交到幾乎目標一半，近期股價由14.1元高位回番唔少，喺12元橫行多時，單位數估值加埋大媽們的祝福，睇今朝開出對辦的話，可跟搭一轉順風車。

「特式」升市存在暗湧

四、五月香港假期好似梅花間竹，芬佬放假去也，散字派也無心股事。上周結算日港股破位兼創廿一個月高位，威過一陣，周五個市成交又再縮水，本周只得三日市，隨時牛牛皮皮悶到下周初再嚟過。

美就業數據成關鍵

上周四港股期指結算，全靠友邦保險（01299）及騰訊（00700）頂住個市，恒指並破埋三月高位24,656點，個個以為好世界，殊不知結算後成交縮返落六字頭，無厘氣氛咁過周末。今個星期斷斷續續得三日市，周五會有美國就業數據及周日法國大選。

古勝比較在意美國四月的就業數據，事關三月新增職位已經撻Q得9.8萬個，同市場估計差近一半，大家賴落去期間暴風雪天氣影響，企業請人無咁積極。

假如四月條數都唔好睇，憧憬美國經濟再膨脹，延續「特式」升市就會有啲啲難度，尤其依家估緊六月聯儲局有66%機會加息，假如就業市場無預期咁勁會唔會有阻滯，周五數據之後應可水落石出。

地產股有權炒落後

運房局話未來三至四年私樓潛在供應量9.6萬伙，按季多2,000個單位，連續兩季創○四年有紀錄以來新高，另一邊廂，香港樓價指數連續十周破頂，創歷史新高，按月升2.44%，前仆後繼的買家，實行當你一堆辣招及新增供應無到。

入門級經濟學，市場均衡價格取決於需求與供應，供應增加樓價不跌（至少未見發展商降價促銷，準買家延後入市等執平貨的情況），證明潛在樓市需求唔嘢小。近日一位朋友因為成家立室需要，一而再入票最後得個抽字，欲購向隅，身邊樓市淡友齊呼 「有冇搞錯」！

銀行畀金管局睇實，按揭閘住半邊窗口，辣招辣到等於唔鼓勵有樓族再買另一物業底下，新盤買家依舊喪屍般「段搶」一樣，香港樓市畸形之外，按打工仔供唔起樓說法，證明北面移入或成功需祖宗幹的唔使做有銀士，的確多到得人驚。

睇番幾隻本地地產股，長實地產（01113）、新鴻基地產（00016）、信和置地（00083）、恒基地產（00012）及新世界發展（00017）大約差2至10%先見到52周高位。如果騰訊（00700）抖氣，周五美國就業數據未能像預期拗腰回升，地產股有權炒落後，新地依然是在下首選，而長實地產近期搶先偷步炒上，似乎吸引到追落後基金寵愛，值得優先考慮。

古勝