Market Insight：iPhone概念股再落鑊

本月恒指高位暫時是24,400點，低位是周三的做出的23,723點，中間價24,061點，同昨日收市價僅差5點。對於輪證玩家，一日唔等到破頂或者穿底一日，都係食住花生等運到好過，否則坐住係咁輸時間值就唔抵。

舜宇發力追趕瑞聲

今年iPhone面世十周年，網上已開始流傳新一代iPhone規格，蘋果概念股趁勢炒到出晒煙，瑞聲科技（02018）昨再下一城，升1.9%報102.3元，三月至今累升25.1%，真係唔講得笑！反觀做光學零部件的舜宇光學（02382）啱啱先攻破三月高位阻力59元，昨升2.65%收59.5元，成交對晒辦，睇嚟「破六」指日可待。早一個星期花旗出報告唱好，目標睇到75元。

近日見網上吹風指新iPhone會沿用雙鏡模組，不過會由打橫雙鏡變成打棟，如果真係全部用晒高毛利的雙鏡模組，舜宇有得炒。

內地收水 股市冇運行

唔知大家有冇留意到，首季中國GDP超額完成，交到6.9%增長的數據曝光後，A股隊足咁多日，到昨日滬綜指先有1點進帳，輾轉返回二月份的起步點。

一來唔少分析都估中國GDP今年高開低收機會相當大，樓市調控措施愈演愈烈，開始由一線擴散到二、三線城市。基於房地產相關投資令樓民身家水漲船高，自我感覺良好對消費市場的推動作用，可能會在今年餘下時間逐步退潮。

更重要是，中國經濟第一季交足數之後，阿爺下半年隨時大條道理推動一直停留喺「口講口賠」，未見貫徹執行的社會去槓桿工作方面，收緊流動性之日漸行漸近，A股自不然會腳軟。南下資金減少對港股有乜影響，相信都唔使畫公仔畫出腸。

騰訊獨大難以逆轉

個市靠大隻佬騰訊（00700）單天保至尊，昨日升2.7%以歷史新高236.6元收市，貢獻恒指達73點，佔指數升幅差不多三分之一。成個市睇實一隻股票嚟玩，都唔係新鮮事，踏入一七年恒指累積升9.3%，反觀騰訊同期升24.7%，跑贏指數幾條街。

換言之，港股基金掌舵人假如唔坐重貨騰訊，想跑贏指數幾乎無乜可能。加上其他重磅股如滙豐控股（00005）回購威力銳減，內銀無故事兼無氣氛，久而久之，形成騰訊貴一貴，大家都焗住要盲衝，芬佬被迫瞓個身落去，博跑贏指數基準的殘酷現實。

汽車股抖過一排，又再靜極思動，龍頭吉利汽車（00175）昨一度升5.1%，埋單升3.1%收報11.64元。瑞信三月中出報告唱淡，引發車股集體閃跌，車股玩家經過一輪震倉之後，似乎已重整旗鼓，未等大行改口，逐漸喺低位買番上去。

故此值得留意隻華晨中國（01114），今浪由14.12元落到11.64元，短期經已超賣，喺一眾汽車股中，今年屬於業績復甦較強的一員，12.5元樓下應可放心上車。

古勝