絲絲講場：甘比姊妹薪酬大躍進 劉鳴煒少收97%
華人置業（00127）前主席劉鑾雄（大劉）上月重組華置股權「分身家」後，華置發布最新年報顯示，大劉老婆陳凱韻（甘比）嘅姊妹酬金水漲船高，反而大劉前妻所出嘅長子劉鳴煒酬金就大減九成七！點解咁嘅？
劉鳴煒淡出華置管理層
年報顯示，甘比姊妹喺華置管理層勢力愈加增大，而劉鳴煒就淡出。劉鳴煒一五年十一月辭任行政總裁（CEO），甘比家姐陳詩韻同日接任做CEO，一六年酬金於是按年增63.12%去到144.2萬元；甘比細妹陳諾韻就於一五年七月獲委任為執行董事，一六年酬金就按年爆升2.86倍去到58萬元。
劉鳴煒冇做CEO，並由執行董事調任為非執行董事，酬金由一五年1,421.7萬元減到去一六年得番30萬元，個酬金Package足足冇咗97.88%！
查實劉鳴煒今年一月冇出席股東特別大會，大家已好關心佢同陳氏三姊妹關係。當時華置罕有書面解釋，話劉鳴煒因商務繁忙而缺席。問到甘比會否入埋董事局，華置當時仲話「暫未有此計劃，遲啲再考慮」。話咁快一個月後，華置就委任甘比做執董，董事會內四名執行董事中，甘比三姊妹佔咗三個席位。
余絲韻