Market Insight:騰訊逢低買冇蝕底

北韓試射導彈失敗,「侵侵」仲唔揞咗半邊咀笑﹗隔晚美股更高收作結,美國財長出嚟講強勢美元長期而言係好事,總之強又話好、弱又話好,即係大、細通殺,投資者真係無所適從。但古勝覺得點都好,「侵侵」的強勢言行開始有動搖,始終實際施政要向現實低頭,到底年內能否如期落實稅改方案,不妨等着瞧。

長假後港股昨日復市走低,恒指午後跌幅擴大至逾300點,失守24,000點關,埋單唔見337點,收報23,924點,主要係被建設銀行(00939)、滙豐控股(00005)及騰訊控股(00700)拖低,三隻合計跌幅相等於恒指跌105點。見到港匯轉弱、大藍籌發軟蹄,唔排除真係有錢走緊,畢竟唔知美國同北韓有幾癲喪,真係開戰,到時先至走貨就太遲,適量減磅係正路做法。

大摩發報告唱好騰訊,話其遊戲、廣告及支付業務定位佳,且在加快投資喺人工智能領域,有助支持長遠增長,故將其目標價由255元調升至270元,評級為增持。

同時,美銀美林亦將騰訊目標價由259元調升至267元,評級為「買入」,主要係睇好公司加強視頻、音樂、體育及遊戲等服務內容,以提升用戶參與度及增加收入來源,亦有助拓展人工智能數據等長遠投資,研發如雲計算及無人駕駛等新業務。顯見,大行都幾幾Buy騰訊的發展模式。昨日騰訊回吐,收報228元,跌1.1%,呢轉落到226元水平,未買夠貨的就要把握低吸機會了﹗

嚴格管控持倉風險

除咗東北亞局勢緊張之外,在下執筆時傳來英國首相話擬於六月八日提前大選,為英國脫歐步伐以至國際金融市場增添不明朗因素。總而言之,首季魚缸安安穩穩的日子已成過去,次季國際金融市場開始進入動盪期,看官宜提高風險意識,管控好持倉風險。

科龍防守力不俗

雖然昨日係跌市,但都搵到跌市奇葩,好似專門製銷冰箱、空調等業務的海信科龍(00921),公布完首季度淨利潤按年大升75%至2.56億元人仔之後,昨日股價逆市向上,高位曾見12.16元,乃52周新高,收報11.54元,升8%,成交9,470萬元。隨着內地穩步推進城鎮化發展,海信科龍核心經營的本土市場前景展望向好。

去年度公司盈利及派息均見可觀增長,而今年首季經營又能延續去年度升勢,股價升得有道理,現價計往績市率約13倍,息率接近3厘,進可攻退可守。

風險因素乃公司約三分之一交易收入來自境外,若國際貿易關係趨緊張,出口業務或添不明朗因素。

概念股「雄風」不再

A股雄安概念股連日殺落,港股相關股份亦冇運行,其中金隅股份(02009)昨跌7%,成交達8.21億元。股權披露資料顯示,上周有基金大手沽貨。

事實上,雄安新區由倡議到啟動建設,到實現新區運作,冇十年八載都見唔到成績,難得呢轉大家開派對開得咁興奮,不過,睇勢短線金隅若失守4元,則有機會預告派對完結,要回補上升裂口位,所以跟炒還跟炒,最好定止蝕位,並要嚴守紀律。

此外,呢期汽車股都好似漏氣咁,其中華晨中國(01114)股價由近期高位14元水平回落至昨日低位僅11.78元,收報11.82元,跌3.7%;吉利汽車(00175)由上月高位12.62元回落至10元水平;廣汽集團(02238)由上月高位14.1元回落至昨低位僅11.46元。

汽車股調整恐未完

有指發改委嚴控汽車業產能過剩問題,其中不具環保條件的燃油車項目不獲生產批准,但到底此舉是否惠及新能源汽車銷情,又係兩回事。所謂花無百日紅,汽車股由去年開始呈一浪高於一浪,近月跌浪算係較大的調整,建議睇實幾隻大車股的表現,一旦確認失守去年以來的升軌支持,宜先行撤退,候調整至支持位出現再作考慮。

古勝