「股神」巴菲特向中國豪客招手，其投資旗艦巴郡旗下地產經紀商巴郡HomeServices同內地最大海外物業網站「居外網」達成推廣協議，希望吸引中國豪客去美國買樓。
HomeServices話，新協議下居外網每月約200萬用戶可瀏覽其盤源，公司仲話中國人已經係除美國人外，美國物業市場嘅主要買家，協議方便佢哋喺美國買樓。巴菲特一向都好重視中國市場，唔單止出中國特別版股神櫻桃可樂，巴郡股東會舊年開始仲提供普通話即時傳譯添。
巴菲特十年前賭指數基金回報表現勁過對沖基金，賭局今年年尾埋單，好大機會贏。不過華爾街有人似乎唔服氣，對沖基金經理Nir Kaissar話美股估值現時睇嚟好高，未來回報應該唔多好，於是再開多局，同被動型基金粉絲卡爾森對賭，押注對沖基金未來十年跑贏標指。不過，巴菲特同人賭100萬美元，呢場新賭局只係賭罐啤酒，有幾認真呢可？
余絲韻