絲絲講場：長汽魏建軍為Sell車改英文名
為咗喺國際響朵銷多啲貨，可以去到幾盡？長城汽車（02333）董事長魏建軍不惜將自己個名由「Wei Jianjun」改做「Jack Wey」！陣國際味，大家Feel到冇？
魏董話驚啲洋人唔曉讀佢個名，所以改朵喎，而佢哋集團旗下高端SUV品牌「魏派」就叫「WEY」。條橋係美國著名Marketing公司Ries & Ries四年前幫佢諗出嚟。
咁多年，唔似其他內地汽車品牌一個二個同外國車廠做Partner，長城一直冇靠「外國勢力」齋靠自己，到依家內地SUV最銷得係佢，做乜忽然要洋起來？
皆因要升級變高檔，阿Jack話驚升唔到級唔夠人氣，會好似當年Nokia被iPhone咁淘汰。佢話最想吸嘅目標客，係會買Kate Spade、Calvin Klein同DKNY嗰啲喎。
國貨輸在人氣唔夠
其實唔怪得人家要洗甩「國產味」，話說市場研究公司Dalia Research最新出嘅「Made-In-Country-Index」，發現全球49個國家製造品牌人氣榜中，排第49嘅就係「Made in China」，雖則個調查都話中國嘢嘅性價比跑贏人哋，可惜人氣就……至於榜首？就係德國製造。明晒。
余絲韻