絲絲講場：股仔累事經紀花紅凍過水？

有券商同絲絲呻，每年四月證券行例牌出花紅，舊年呢個時候，好多證券行中人復活節前都已「袋袋平安」，假期風流快活去！但今年左等右等，等到頸都長，有啲到依家派花紅都冇聲氣。

追唔到孖展要硬食

鬼咩！近排咁多股仔輪流玩高台跳水，以往幾個月都冇一兩單，依家差不多每月都有。如果大股東押咗股畀證券行做借貸，或者散客借咗孖展，遇上股價大插水，證券行追唔到孖展就要硬食。

聽啲券商話，去年港股成交差，原本都對花紅金額唔太樂觀，依家仲要有咁多股仔出事，券商分分鐘領嘢，所以大家對四月份派嘅花紅完全唔寄予厚望，總之有得派都偷笑同感恩咁話！

老行尊嘆港股變質

佢哋話，其實影響可能唔止一年添，仲預計未來三、四年嘅花紅都唔會好。咁悲！

不過，港股愈來愈A股化，股市依家好多問題！有老行尊慨嘆，廿幾三十年來都冇聽過有假股票，依家竟然話有，最近假通告、假數都浮埋出嚟，想問香港股市乜事？

余絲韻