想捕捉上落市變成單邊市一刻，最艱難的地方是大家可能經歷N咁多次走勢陷阱，才守得雲開見月明，等到確認破位，出現單邊升市或跌市。
恒指各移動平均線纏繞在一起，市況牛皮動力不足，配合現貨成交淡靜，大戶要作短時間的突襲易如反掌。昨日大市最後一小時市況，不得不寫個服字，透過掃高恒指權重股騰訊（00700）產生的漣漪效應，大戶把恒指一口氣推到全日高位24,313點收市，升225點。要留意是，主板成交只得718億元，尾市極具挾淡味道。
昨日恒指幾乎做出破腳穿頭的大市轉勢信號，當然，以咁奀的成交也實在難以令人信服。縱使恒指重返10日及20日線之上，但實際上也不過是回到23,982至24,656點的大型上落區域的中位。
經過昨日一挾，大市又要還原基本，回到上落市的泥漿摔角走勢，睇嚟要等復活節假期完先見真章。唔想好似賭博大細持續度過假期，已做淡的，可考慮等機會趁今日期指退落24,150點附近離場。
John Mullen