Market Insight：大灣區概念吸引值博

跟北水炒番轉中旅

老實講，眼前炒作粵港澳大灣區會較雄安新區來得實際，一來大灣區概念涉及香港發展，二來粵港澳合作由來已久，在國策主導下進一步融合戰略與實際意義兼備，難怪醒目錢臨長假前都要急住先掃一轉。

其實隻香港中旅（00308）都係主力做珠三角旅遊景點區業務，值得關注。去年公司加大力度處置盤活低效資產，將一些長期虧損和行業經營受限的企業，逐步落實退出和轉讓，此舉換來短痛，受一次性項目影響，去年度公司純利倒退。但長遠而言應有助為業務去蕪存菁，提升盈利能力，加上母公司不乏資產注入，若着力發揮好作為在港上市旅艦的角色，都唔憂冇前途。

見到北水買盤積極收集中旅，花紙顯示港股通（滬）及港股通（深）喺中旅的持倉量達2.2億股，相等於已發行股本的4%。中旅現價2.27元，仍處於去年次季以來的上落區內，跟隨北水身影逢低收集，大成交突破2.4至2.5元阻力位再睇位加注。

騰訊破位後萬里無雲

港股昨日早段仲喺24,000點附近浮沉，都諗住靜靜局又一日，點知下晝兩個樣，恒指突然抽升逾兩百點，收報24,313點，主板成交718億元，主要係騰訊控股（00700）發力，以歷史新高231元收市，升2.67%，相等於貢獻恒指69點升幅，成交額達35.9億元。古勝相信，若然騰訊呢轉企得喺230元樓上，今季有機會上叩250元大關。

內地官媒指國家主席與「侵侵」通電話，就朝鮮半島局勢及敍利亞問題交換意見。「侵侵」上任之後美國財政部第一份匯率評估報告估計會喺本周末出爐，會否一如所講將中國列為貨幣操控國，乃市場焦點所在。

按道理，中美兩國元首會面後落實展開中美貿易百日計劃，若美國在計劃商議期間出招，會被視為不友善行為，仲點樣商議下去？所以古勝認為，今次「侵侵」會高抬貴手，睇所謂的「百日計劃」攞到幾多着數先至行動。據講內地已同意擴大美國牛肉進口，至於會否開放金融服務業准入，自然係市場焦點。

處理樓市要等交棒

雖然特區政府修例，「一約多伙」要繳付15%印花稅，但獨孤一味的招數唔見得效用有多大，故見對地產股負面影響並非想像中大，有新盤開售的長實地產（01113）昨仍升1.7%，新世界發展（00017）冇升跌，信和置業（00083）則升1%，在預期新盤成交將下跌之下，美聯物業（01200）股價亦僅跌0.9%。

事實上，係人都知「一約多伙」乃炒家與發展商鑽法例漏洞之舉，係用嚟營造新盤氣氛的伎倆，實際個案唔多。不過，今次政府做完呢個動作，相信六月底前都唔會再有加辣行動，咁對本地地產股嚟講，又唔係壞消息得晒！

上月底預言政府會在任何一個禮拜五出招加辣的花旗，亦估計短期內應該唔會再有印花稅之類的辣招推出，但若然樓價繼續飆升，則金管局出招收緊按揭的可能性仍不能排除。

在下就認為，與其再在按揭同稅務方面斟酌，倒不如諗吓計點樣喺短時間提供多啲供應畀用家上車仲實際，但呢方面就只有寄望下屆政府。換言之，至少喺次季內，地產股基本面將會維持。

古勝