絲絲講場：合興唔敢喺內地做放題

CEO洪明基（Marvin）嘅回應就夠晒婉轉：「香港人食放題『比較』斯文」，至於內地就覺得搞唔成啦，因為佢見過內地嘅顧客就算要加錢，單點牛肉都可以叫成十碟，食量夠晒驚人！得，明晒。

推咖喱湯底迎重口味

唔做放題唔緊要，Marvin話做過調查，見北方人重口味，食嘢偏好濃味，所以特別喺內地推出咗咖喱湯底火鍋，盛惠48大元。

絲絲尋日有幸一嘗來自北京直送嘅湯底，唔知第時有冇機會喺香港食到呢？Marvin話，雖然香港吉野家唔屬於上市公司業務，但係都可以同大股東嗰邊提議下。

講開一人火鍋，香港吉野家同其他快餐連鎖店都鬥到難分難解，合興公司秘書黃國英（David，並唔係嗰位股評人黃國英Alex）就話，二十年前喺北京就已經食過一人火鍋，依家公司主攻京津冀，都要多啲推出新產品，先至可以進步o架嘛！

余絲韻