北水頭等倉：白雲山勝在有北水撐場
內地股市昨日午後收復失地，滬綜指升19點，收報3,288點。其實，次季A股面對的最大風險，乃外部因素，如中美貿易百日計劃進展、美國財政部會否判中國是匯率操縱國，以及地緣政治因素等。
不過，經驗顯示，外部因素愈係不明朗，上大人就愈係會加大內部維穩力量，所以對季內A股展望又不宜過於悲觀。
石藥候低再翻兜
至於港股，已公布大藍籌業績對市底起到支持作用，相信會維持上落格局居多，短線恒指失守24,000點的話，可以靜候在23,500至23,600點水平入市的機會。板塊方面，可以睇睇醫藥股。
筆者一直睇好的石藥集團（01093），上周股價一度上過10.7元新高，之後回落至9.8元水平，長期持有可以少理繼續坐定定；想炒波幅的話，短線落到9.5至9.6元水平乃第一個支持位，下一個支持位在9至9.1元水平，若然在高位走咗貨，不妨睇實支持位再翻兜。
另一隻值得留意的醫藥股係白雲山（00874），今年二月股價在19元水平起步，反覆升抵上月高位見24.9元，之後回落至22元水平。
睇番互聯互通股份持倉花紙，北水於此股持倉有6,399萬股，佔已發行股份29.09%。既然街貨量集中度一目了然，除非公司有咩壞消息，否則股價調整得咁上吓，又可以睇位落注，暫看可候回落至21元邊落首注。
司慕渢