Market Insight：港股未宜看得太淡

去年十一月，美國總統大選爆冷，股、匯、債市冇大散不特止，反而大炒特炒「特朗普經濟學」。可是，隨着預算今個月曝光的減稅方案遲遲無影，針對中國貿易的口風都見軟化。

近日美元回軟，債市回勇，似透露炒作有結束甚至走番轉頭的風險。競選時信誓旦旦要廢的奧巴馬醫保法案，上周終於在共和黨意見分歧下撤回收場。狂人第一炮就撻Q，華爾街的「Trump's Trade」睇怕都要告一段落。

如果美股腳軟，短期對港股衝擊無可避免，但中長線又未必要太過悲觀。道指由去年大選以來，由18,332點至今累積升2,264點或12.3%，對比同期僅累升6.3%的港股，升幅多出近倍。然而，過去幾個月環球資金湧入美元資產的情況，可能會告一段落。

近日中國經濟數據有好轉迹象，在減少成分股數目後，今年A股入摩機會高唱入雲，對中資股有漣漪效用。更重要是，「特朗普經濟」主張死火，聯儲局更快加息的風險減低，對港股正面。故政治市若令短期市況波動，或會是港股投資者一個趁低入市的良機。

一注獨贏真係話咁易？

古勝經常都話，當港股愈來愈A股化，普通散戶真係唔好成日夢想「一注獨贏」，瞓身一隻二、三線股博爆升可以唔使做，反而隨時輸鑊甘。

避開地雷以免損手

舊年曾被沽空機構渾水狙擊的輝山乳業（06863），上周五突然爆瀉，跌幅一度達91%，於午市後宣布拉閘，停牌前報0.42元，大跌85%，短短時間市值唔見咗320億元，得番56億元。

插成咁，街外自然傳聞多多，但大多是無法求證。如果問在下點先可以避過呢類暴瀉股，只能話依家股市通處地雷，老實講除咗唔好將全部雞蛋放入同一個籃之外，仲要睇吓公司盤數同賺錢能力，如果靚得太過離地的話，就要執生，正如有句歇後語話齋「光棍佬教仔，便宜莫貪」。

地產股趁調整上車

近排在下多次提過睇好大落後的本地地產股，一來係中資盲搶地，在地皮招標掃高麵粉價，對於囤積數千萬呎土儲的本地發展商係好事而非壞事，今年市場對聯儲局可能加息的幅度，亦有過分反映之嫌。

新措施影響有限

上周傳內地堵塞走資又有新招，銀聯禁止內地客碌卡過數買樓。以依家一間300呎唔到的新樓都賣緊700萬至800萬元，一成都講緊近70萬至80萬元，到底有幾多內地客真係唔嫌煩碌卡買樓？古勝真係無咩頭緒。

不過，市場係最老實，上周五新鴻基地產（00016）尾市掃番上去，多少反映內地措施心理影響大於實際的事實。如果地產股仲有餘震，未上車的或者可以考慮，在下心水都係新地，副選搭隻長實地產（01113）。

古勝