絲絲講場：金管教路 銀行開戶由頭學過
為咗打擊洗錢逃稅，香港銀行嘅開戶審查比以前嚴咗好多，搞到唔少人開戶難，金融管理局反應快，即刻推個網上專頁教路，畀開戶失敗嘅人參考！
設專用電郵解疑問
個網上專頁涵蓋開戶同維持銀行戶口嘅程序、開戶所需文件同銀行聯絡資料，兼提供埋實用貼士。特別嘅係，仲列舉埋銀行處理開戶時唔應做啲乜，打緊銀行工嘅亦唔該睇睇。
絲絲入去望過，發現原來唔少港銀都提供網上預約個人開戶服務。個Page都羅列埋一啲有興趣為海外中小企、初創企業提供公司戶口服務嘅非零售銀行資料，Startup公司可以參考吓。
睇晒都覺得唔明？做足準備都仲係開戶失敗？唔使灰，可以Email金管局呢個專用電郵 「accountopening@hkma.gov.hk」講低，有專人答。祝開戶成功兼唔會畀人Cut戶口！
余絲韻