絲絲講場:昆機獨董等唔切 周日SMS辭職

上市公司董事邊位最潮?可能係國企昆明機床(00300)位「前」獨立董事楊雄勝,事關佢Send SMS(短訊)辭職。

上市公司董事辭職好常見,但好似昆明機床咁就罕見啲。公司周二出通告,話今年三月十九日上午(當日係周日!)收到獨立董事楊雄勝辭職短訊,公司之後多次溝通挽留都冇用,兩日後就收到楊生嘅書面辭職,楊生仲強調自己兩日前已正式辭職。

指會計品質建議無人受

唔通楊生係時下年輕人?No喎,佢今年已經57歲,係南京大學商學院會計系主任。睇番公司年報,原來楊生今屆董事任期到今年十月底先完,仲有半年時間都唔等得,做乜咁急走?

公司通告話,楊生「因公司在會計訊息品質上一直不聽取其個人改進的強烈建議」,所以佢辭職唔做。

中證監查緊違規 恐退市

睇番,公司其實周二發過通告話「收到上交所關於公司涉嫌財務違規事項的問詢函」,到周三再出通告話公司「接到中證監調查通知書」。查實昆明機床因為連年虧損,A股已經有個ST嘜頭,如再蝕錢,可能避唔過退市。

余絲韻