加息，真並非想像之中咁恐怖。傳說中的「超級星期三」，我們終於都捱過咗喇。聯儲局公開市場委員會（FOMC）於一片鷹叫聲中落實了市場的加息預期，即係加0.25厘，再重申今年會加夠三次。
耶倫又於會後聲明中話，提前於第一季就加息，係唔想於較後的時間加得太急。你睇！耶老太佢急市場所急，一字一句都對市場呵護備至，邊度似鷹？簡直係一隻溫婉的鴿嚟！
我於議息前的早上已清空了原意係用來對沖正股倉位的熊仔。無他的，因自己研發的動力指標並唔指向一個要跌的市。就算係恒指於周三早上一開便暴跌200點那一刻都係咁話。
然後，我再睇批本地地產股，到周二、周三隻嘉華國際（00173）都仲升緊超過半成！有時我諗，莫非本地的一手樓盤的銷情真係好到地產股都唔識跌？那刻我開始真的相信個市其實真係乜都入晒價！
荷蘭大選結果已塵埃落定，極右政黨贏唔到，又一個計時炸彈被拆落嚟！英國的文翠珊？市場都一於少理。反而歐洲央行日前表示會考慮於停止購買資產之前就加息，對歐元的提振來得更有裨益。
美債孳息都急跌喇，美匯都回落喇，離岸人民幣匯價（CNH）於隔夜就暴漲了逾500點子！恒指於昨日跳空300點之後再高走，收報24,288點，就連上月份的頂位24,216點都收復埋！
接下來，恒指上望的參考阻力就只得番一個：24,364點，即去年九月九日浪頂的day high。市場仲有無被聯儲局加息同人民幣貶值等更大殺傷力的利淡因素呢？可能有，咪就係我於周三同大家探討的債限問題囉！當這個問題都解決埋的話，恒指要上埋「25樓」又有幾難啫？
富昌金融研究部總監 譚朗蔚（作者為註冊持牌人士）