Market Insight：手機設備股又起動

港股破頂，升穿二月底高位24,216點，意味去年底21,488點開展的升浪，進入全新階段。加息塵埃落定，息口敏感股反而見炒落後，領展房產基金（00823）升2.8%。

瑞聲應該仲有水位

今年是蘋果公司iPhone面世十周年，身為果粉，古勝已睇實晒一堆rumor網站，雖然距離iPhone傳統六月發布期仲有一段時間，但今年新產品消息已經唱到行，唔單止可能先推一部紅色特別版應市，由供應商及蘋果公司分析師的收風，新一代產品會大幅改動，唔再沿用iPhone 6以來小修小改的設計，總之務求要大家使錢，曲面OLED、無按鍵傳到似層層。

點都好，每年通街消息之際，意味又到炒蘋果概念股之日。唔講唔覺，飲蘋果公司奶水大的瑞聲科技（02018），每年iPhone面世前都寧舍醒神，過去五年，三至六月期間股價表現錄得四升一跌，僅一五年跌13.9%（當年推唔叫好又唔叫座的iPhone 6+），都幾自動波。

睇番二月底到依家股價升近5%，假如十周年來個大變革，照咁睇，85元邊的瑞聲應該仲有唔少水位。

地產股隨時升多浸

參與咗股市遊戲咁耐，古勝深明牛市之中，投資者有選擇性將視線聚焦利好消息的傾向（熊市則剛剛相反），華爾街為聲明「唔太鷹」而雀躍，卻將聯儲局對年底利率預測，預測加息三次以上的委員數目增加3個去到14個視而不見。

查實「侵侵」當選至今，美股由一窩蜂睇淡，到不問因由恐慌追貨，經歷咁多個月，相信大家已見怪不怪。姑勿論點，加息後市場第一個反應，是美匯及美債息趁消息掉轉頭往下炒，形勢短期對港股有利，要好好把握機會。

海航集團再以天價掃入啟德第四幅地皮，網民抽水話未來啟德應改名「海航城」，次次入標次次唔中而被邊緣化的香港地產商，唔知笑唔笑得出。

不過，地皮價搶高對土儲豐厚的五大發展商，價值重估的好處仲係不言而喻，下次美國加息好可能要等到六月，短期有條件再上。

航空股追落後

近日國際油價下滑，並一度將自去年十一月油組減產後升幅抵銷，雖然隔晚見反彈，但預期未來不明朗因素仍多，料短期仍維持於50美元附近反覆。

油價回落有利降低航油成本，內地三大航空股近日齊發力，中國國航（00753）、南航（01055）及東航（00670）股價均升至逾三個月高位。

國航公布二月載客人數錄得798.7萬人次，按年增2.8%；南航二月載客人數993萬人，按年升6.8%，旅客周轉量按年上升8.1%。中金公司最新報告表示，國航及南航在今年首兩個月客座率較高，重申予國航及南航A、H股「推薦」評級，予東航A、H股「中性」評級。

行業基本面好轉

根據國際航空運輸協會數據，今年一月全球航空客運需求同比增長9.6%，是五年多以來最高增幅，另一月內地農曆新年的客運量亦增長強勁，反映行業基本面持續好轉。三大航空股現價往績市盈率均僅約11倍，在油價下跌及人仔回穩等利好因素下，短線料有追落後空間。

古勝