絲絲講場：硅谷IT人床位 月租萬五蚊
咪以為只得香港樓價租金癲，美國亦都一樣。啲硅谷IT人為尋夢，一樣要靠平租床位過日子。
較單人房平一半
就好似二十五歲嘅Zander Dejah依家就同超過四十個IT人，合租硅谷鄰近嘅三藩市市中心一幢公寓，計番一個床位月租成一千九百美元（折番差唔多港幣萬五蚊），但係喺當地嚟講已經比一人住房嘅租平成一半。
棟公寓有三層共五十間房，啲房放晒碌架床，大房四張，細房兩張，浴室與洗手間要共用。
無他嘅，喺硅谷裏頭嘅科企打工，除非你係高管，否則，喺附近租個平租床位外，別無他法！從好處去諗，咪當自己未畢業住學校宿舍囉，仲可以同啲行家集思廣益添！
余絲韻