絲絲講場：弘和上市五敲鑼 CEO貪意頭

點解咁講？話說尋日係弘和上市大日子，佢嘅控股公司弘毅投資母公司聯想控股（03396）董事長柳傳志都畀面出席，仲同弘和CEO（行政總裁）張曉鵬一齊敲鑼，兩位興奮到敲一次唔夠喉，連敲五下咁多！雖然聯交所冇規定上市公司敲鑼嘅次數，之不過連敲五次絲絲都係第一次見！

張總解釋話，五下敲鑼代表五福臨門，應該冇前人做過，就好似公司咁有創新嘅精神！主席兼非執董趙令歡就話係高興嘅表現。嗰「五」下幾重要，絲絲都睇得出。

而「四」係張總一家四口撐場，張總笑到見牙唔見眼。

永順一手帳賺百元

講到「二」，就係弘和認購反應一般，公開發售只係超購兩倍幾，不過主席趙令歡話超購倍數唔代表一切，有實力強大嘅股東認購先係最重要！

睇番弘和首掛股價唔算突出，輕微高開後曾急插兩成半，雖然隨即「V」彈，但上番「水面」後只係於招股價水平橫行，全日收報12.96元，較招股價12.8元高1.25%，唔計手續費一手帳面只賺32元。至於同日上市嘅永順控股（08421）則收報0.44元，較招股價0.42元上升4.76%，一手帳賺100元。

余絲韻