Market Insight：食品股高增長不再

睇吓藍籌業績，中國旺旺（00151）去年度收益下降7.9%，純利微升4%。年內除米果類業務收益按年增長4.6%，其他如乳品及飲料類，以及休閒食品類業務收入均告下跌，全年派息下降，末期息每股派1.19美仙。

旺旺估值今非昔比

整體而言，旺旺業務收入未復增長軌道，而在資本開支平穩下，手頭淨現金有所增加，亦一定程度反映公司未有新的發展動向。而全年每股派息下降，對收息的小股東而言，亦非喜訊。

旺旺股價由一四年高位13.1元水平回落至現時5元水平，累跌逾六成，除了反映基本因素，亦反映行業估值已今非昔比。基於增長前景未復吸引，相信股價會繼續維持在低位反覆，食之無味也。

事實上，去年康師傅（00322）已被剔出恒指成分股，換入瑞聲（02018），唔多唔少都反映食品業高峰期過去。要打破悶局，旺旺宜積極善用經營現金流及手頭淨現金再投資，拓展多元化業務，重建增長動力，保持品牌活力是一家消費企業長青的最大考驗。

石油股未宜過分看淡

藍籌內銀及內房股抖氣，而上大人話今年要搞債券通，港交所（00388）股價逆市升1.4%，收報194.7元。不過，經歷過滬港通同深港通，相信大家都學識得要理性看待呢啲互聯互通相關新聞，小注短炒消息要見好識收。昨表現最差的藍籌，係公布巨額虧損的國泰航空（00293），一家公司走下坡會衰開有條路，都係行人止步！

此外，國際油價反覆回落，中海油（00883）及中石油（00857）亦受壓。其實，「侵侵」的能源政策鮮明不過，就是要一反上屆政府限制化石能源開採及鼓勵新能源發展，反而支持傳統能源開採，質疑清潔能源作用，反對氣候變化政策等。

如果真係落實，石油產業將迎來翻天覆地的轉變，能源行業轉型生變，石油產量看漲之下，油價將面臨下行壓力。

同時，傳統油氣企業有勢重新在能源企業手上奪回行業發展主導權，加上以「侵侵」所奉行的大美國主義，會唔會喺中東地區再生事端，也是未知數，故亦未宜過分看淡石油股。

以中石油為例，股價回落至250日線（現處5.46元），中海油股價落到8.5元樓下，可留意分注收集機會。

半新股鑊氣愈燒愈旺

半新股繼續有睇頭，美圖公司（01357）股價昨再創14.56元新高，收報14.22元，升11%。今年單係揸住呢隻股，可贏到開巷，可惜唔係咁多人過到自己嗰關。美高域（01985）走勢亦估佢唔到，早段落過掛牌以來低位2.46元後，掉頭抽到上高位見3.18元，收報3.01元，升16.6%，波幅夠大啱晒炒家胃口。

講開新股，早前證監大員發晒火話要注意創業板股圍飛情況，其實大家生性啲收斂吓，避過風頭就冇咩事，點知都仲係有新股照樣大裂口高開炒上，結果中午被人叫停賽。敬酒唔飲飲罰酒，怪得邊個！

有人撞板，後來者有所警剔。昨日見隻創業板新股興銘控股（08425）掛牌，招股價0.75元，收報0.83元，升幅好溫和，啱晒監管者胃口。

整治一刀切非好事

依家有說法指，證監會考慮要求創業板一律要做公開發售，避免全面配售自編自導自演亂局再發生。不過，唔上主板而上創業板，都知申請企業經營業績未夠秤，吓吓要做公開發售的話，申請上市的門檻就必然會增加，咁會唔會有礙真正需要尋求上市融資的初創企業上市？

看來相關監管部門都唔好意氣用事，整治還整治，同時在市場發展和監管完善之間亦要取得平衡，一下子收得太緊並非好事。

古勝