絲絲講場：馬化騰身家隨時贏番王衛

摩通唱好騰訊升65%

美國財經雜誌《巴隆氏》就引述咗細摩呢個報告，原來細摩嘅分析團隊相當睇好內地金融科技業，估計行業收入會繼續水漲船高，在二○二○年之前可以飆升到4,600億元人仔咁話。只要科技巨頭騰訊順勢分到一杯大羹，市值增長潛力就認真「和味」，騰訊股價將有65至78%升幅空間喎。

順豐昨跌穿60蚊人仔

嘩！呢個預測一出，再睇騰訊尋日收市價214.6港元，如果股價真係至少升65%，即目標價354.09港元不是夢。若馬化騰一直持有8.27億騰訊股份兼等到呢個目標價計，佢副身家就自動跳升到逾2,900億港紙，拋離王衛過千億港元。

因為順豐尋日收市已跌穿60蚊人仔，以王衛手持順豐64%股權計，身家逾1,800億港元。當然唔排除順豐股價都會升，不過，大嗱嗱逾千億元嘅差距，點都要啲時間追。

余絲韻