本欄於早前同大家討論過，內房以天價來港投地的「新霸權主義」搞到本地的發展商聲都無得聲。到底相關的房企係咪真係咁有錢？又未必，我有同大家講過有內房質押系內股票來融資找數的故事吧？「想買就嗌咗先，要錢便就地籌」一向都是內地企業來港掃貨的手法，邊使擔心托唔到錢落嚟呀？
高度崇尚信口開河，且能夠將這種「講咗先諗點做」的精神發揮得淋漓盡致的，莫過於「侵侵」！從他當選到上任到發表第一份的國情咨文，其中講到令全球為之一振的1萬億美元基建，其實到呢一刻都係一蚊都未花過的！點解？因為個budget都未畀國會批。批過之後，仲要政府發債先有錢到手，你估真係講吓就印呀？
我上周五預告過，今日要同大家解構多一個金融市場危機，就是聯邦債務上限到期！今年好少人討論這話題，點解？因奧巴馬一五年十月簽署《一五年兩黨預算法》，授權華府於今年三月十六日或之前可展開任何數額借貸，而不設債限，方便佢大使特使去救經濟。
換言之，假如今晚傾唔掂數，18.9萬億美元的債務上限就會重提。而截至本月七日，已負債19.85萬億美元的華府就唔准再融資，甚至可能違約！若嗰係咁，「侵侵」點去落實基建？點去承擔涉及7.2萬億美元的減稅方案？係咁，美股仲可以升得咁過癮？
善忘的你可能會問：大美國佬點會唔通過提高債限來搵自己笨？唔係未試過的！對上一次是一三年，美國政府除國家安全部門外，各部門於就十月一日至十六日集體關門，拖累全年的GDP放緩了0.5%！所以大家睇實，假如呢兩晚債息忽然抽升而美匯急跌就要執生喇！
富昌金融研究部總監 譚朗蔚（作者為註冊持牌人士）