Market Insight：電力股炒落後首選

跟住資金流實無衰

昨日的升市，起動板塊甚多，短炒只有跟進資金流行事，唔使點用大腦。就如內銀股表現強勢，五大內銀股升幅介乎2至3%，交投活躍，好耐冇見有咁齊心上升。之不過，睇圖內銀股只係處於短線反彈浪中，若然突破唔到上月下旬至今的高位，短炒宜見好識收，咪貪勝不知輸。

若然要博中資板塊繼續輪流炒上，相對落後的有電力股。華能國際電力（00902）、大唐發電（00991）、華潤電力（00836）、華電國際（01071）及中國電力（02380）昨升幅介乎1至2%。有消息指，發改委昨日召開煤炭工作會議，綜觀今年煤炭仍維持供大於求的局面，煤價有下行壓力，火電企業成本有望受控。

上述五大電力股之中，論走勢以華能及中國電力比較可取，不妨留意交投表現，睇吓博唔博到遲來先上岸！

宏洋爆發 吼五礦地產

除咗內銀股之外，昨日二、三線內房股、建材水泥股全線走高，其中尤以二、三線內房股升幅最為突出。

以中海宏洋（00081）為例，由上周初2.8元開始起步，以為上周四低收升勢斷纜，點知上周五同昨日再出兩支大陽燭，昨日一度高見4元，收報3.94元，五個交易日升咗四成，真係幾厲害！公司將於下周二公布業績，反正捉得正呢個升浪，呢啲位點都係贏，唔想博業績隨時可以割禾青！

中海宏洋的特點，一來控股股東夠硬淨，二來以內房股而言，公司市值唔係大，以昨收市價計，市值才89.9億元，即係上周初起步前市值才63億元市值，較易炒上。

控股股東實力厚

參考類似的條件，若有意追落後，古勝留意到隻五礦地產（00230），又係控股股東硬淨，公司市值才34億元，呢兩日成交都有所增加，美中不足係平時交投唔太活躍，呢兩日成交多啲但都係講緊幾百萬股成交，所以只可作為小注冷敲之選，唔對路就要嚴守止蝕位。

大笨象不愁發展機會

講到昨日市場的焦點股，當然係大笨象滙豐控股（00005）。集團宣布委任友邦保險（01299）行政總裁杜嘉祺出任董事及候任集團主席，十月會接替范智廉出任集團非執行主席。

由於杜氏加入友邦後，帶領友邦實現上市，營運連年錄得佳績，所以市場都期望今次大笨象覓得福將過檔，可以重振「象威」，故見滙控股價昨日一度抽上64.6元，收報64.35元，升2.14%，單日市值進帳272億元，初步睇腳頭唔錯！

老實講，英國脫歐，美國行貿易保護主義、奉行美國人優先、獨大政策，未來英國與中國的戰略關係有望加深。作為英國及香港龍頭金融企業的滙控，其實並不愁發展機會。

集團喺內地市場發展尚未見真章，新任高層會否帶領滙控開拓內地市場，重建盈利長期增長點，確是小股東一個好大的期望。

友邦表現此起彼落

反觀友邦少咗名福將，股價即時受壓，昨跌2.98%報48.8元。從近期收緊醫保住院索償，到今次有高層離職，似乎運氣向下有條路。我係小股東，中線會考慮信邪，減持友邦，增持滙控。

古勝