絲絲講場：45歲發唔到達 唔使再諗？
「人生有幾多個十年？」係堅嘅，原來人搵錢有「黃金十年」，錯過咗恐怕就要一世捱窮，直接啲講，45歲都未發達，睇怕以後唔使旨意再諗。
明尼阿波利斯及紐約聯儲銀行研究員最近發表一份報告，分析當地人一九七八年至今嘅賺錢趨勢。
打工頭十年最好搵
研究發現，無論係普通人、有錢人定係超級有錢人，最賺錢嘅時期都係喺佢哋剛出來做嘢嘅頭十年，即25至35歲嘅時候。一過咗呢個階段，以後整體嘅賺錢能力會相對減少。
報告顯示，啲人喺45歲之後，足足有90%錄得收入減少，相信係因為呢個年紀後，大部分人工作時間開始減少，尤其係做體力勞動嗰啲，即是手停口停。殘酷啲講，即是45歲後收入唔跌算偷笑。
連敬涵：我啱啱相反
不過有本地財金人就唔認同呢個研究結果。依家四字頭嘅小牛金服行政總裁連敬涵（Kingston）話：「我自己初入行證券業有7,000幾蚊一個月，喺同一間公司做咗11年後，離職前月薪都係得2萬幾蚊。反而之後10年轉咗幾份工，無論以百分比定實際金額計，月薪增長都多過頭10年。」
至於發咗達未？Kingston話人人定義唔同，而且不論收入高低，工作稱心、開心先最緊要喎。
余絲韻