孖妹Ｓ檔案：牛熊角力市 攻守有路捉

國際基金：調整正常 可見25000

洲：宏利資產管理亞洲區股票投資部首席投資總監 陳致洲（Ronald）

Kitty：點解……究竟點解恒指幾年嚟都唔能夠企穩喺24,000點樓上，係咪宿命嚟？

洲：唔係宿命……近期恒指已經升咗約10%，回一回氣好正常，上年年中至今，市場焦點落喺中國經濟增長同美元身上，呢個情況會延續落去，中國喺舊年第二季開始有明顯嘅刺激措施，所以經濟開始慢慢穩定同擺脫硬着陸，令好多資產都升得好好，但去到今年第二、三季，可能會受累高基數效應，唔可以再推升恒指；未來觸發點會落於美元身上，美元近期都處於強勢，其實美國總統特朗普係幾想美元弱，可提升美國競爭力，但佢嘅內政政策，好似保護主義等都會令美元強啲，投資者現未有明確睇法，所以短線就會喺24,000點上下徘徊，我依家睇法比較中性，全年大有機會見25,000點。

港銀地產前景夠穩

彩兒：依家講美國三月加息講到似層層咁，殺到埋身喇！

洲：如果美國三月加息，美元強，對國際股市，尤其係新興市場會係負面，但自從深港通推出，又冇上限之後，特別喺過去6星期見到內地錢落嚟香港，因應人民幣貶值、港元強，港股都會比較正面，相信到時股市會好波動，雖然係會利淡新興市場，但對內地錢嚟講，好似內地券商就會投放多啲資金去美元、港元嘅資產，到時兩方因素就要「扯大纜」，可以喺受惠強美元嘅板塊尋寶，對香港銀行股有幫助；不利原材料股、持有多美債嘅紙業股同航空股；加息對香港樓價有打擊，但美元帶動港元強，中資投資者就會嚟買物業，所以我睇香港地產股比較中性。

Kitty：執投資倉時，邊啲有得留低？

洲：我覺得油價已到晒位，啲人睇60美元實在太牛，短線會喺現價徘徊，過往油股升勢明顯；原材料股唔係要睇需求，而係要睇供應，但升幅太大，抖抖氣唔出奇，當中水泥股會好少少，皆因佢較地方化，好睇地方政府政策，而且水泥價冇銅、鐵價升得咁勁，加上喺一帶一路之下可受惠，主力中國中部、近巴基斯坦地區嘅公司係首選。

華消費及內銀看升

洲：可以留意內地消費、醫療同內銀H股，佢哋走勢落後，若然內地PPI可以靠穩，甚至CPI可以走出低谷嘅話，上述股份可望做好，另外，我亦睇好汽車分銷商前景；醫療上兩年走勢落後，現時國策明朗化，最近股價開始反映，宜選分銷能力強、有全國性銷售網絡嘅公司；內地經濟穩定咗，內銀呆壞帳可能會較可控，市場仲未反映，估值仍然係平，資金有機會由資源股流入內銀。

本地基金：港零售板塊睇定啲

仁：Chartwell Capital創辦人兼首席投資總監 陳惠仁（Ronald）

彩兒：你覺得依家有乜股係貴到有燶味，或者似足燙手山芋呢？

仁：又唔可以話好貴，好似航運、商品股咁，普遍喺近幾個月升咗30%、40%，都唔可以話係貴，但行業又未叫做復甦，所以我哋就應該審慎去睇。嗱，用航運股去睇就最明顯，啲集裝箱公司、其他航運股都未叫貴，部分有私有化或合併概念，我呢類價值型投資者就唔會想依賴消息去買；零售業都係，喺個底部升番30%、40%，但香港零售市道係蕭條咗少少，租金唔會再大升，傾新租約時甚或有得減價，只是現行租約又隨時要等多一、兩年，呢類股追唔追，要諗諗啦！

雅各臣藏另類機會

仁：其他十五、十六緊嘅股份包括惠理集團（00806），我哋年頭好鍾意，當時6.1至6.2元，因為基金業過咗舊年最嚴峻嘅時間，上番高水位，收番表現費，呢類公司開始業務上好轉，但現價已經喺七蚊樓上，三個禮拜升咗20%，當時買又買得唔多，依家賣又「食之無味、棄之可惜」，好多股份都令我有咁嘅感覺。

Kitty：你隻基金舊年回報約4.6%，跑贏恒指，近期揀到乜愛股幫你手？

仁：我會鍾意啲有派息嘅股份，最好有3%以上股息率，呢類股份作為首選會幾好。你睇一五年，個市可以一升就升到28,000點，一跌又跌到20,000點樓下，呢啲紙上富貴唔現實，佢派息起碼證明賺到錢會同股東分享，若只尋求股價升值，呢個策略炒味太濃喇。

仁：作為香港基金，最鍾意撐「香港概念」，最近幾鍾意雅各臣科研製藥（02633），係半新股，冇乜人講，佢製造嘅通用藥物係供應畀醫管局，揸住保濟丸品牌，個個掛住炒創業板爆升股，忽略咗啲質優股，呢啲反而係另類機會。

彩兒：你唔肯預測恒指走勢，係咪賣關子？

仁：港股未來受美國加息、資金流、內地政策、英國硬脫歐等影響，香港係國際城市，乜都關香港事。再者仲有特首選舉，呢啲事都左右緊投資者心態，但係以上事件都唔會帶嚟很大風險，邊個做特首都差唔多，哈哈，英國脫歐可能會引起歐洲走資潮，但或者啲錢會走嚟香港都未定呢？而且，全世界都知道係加息周期，影響就唔會好大喇。

恒指近24,000點水平有健康調整係合理，我依家買咗嘅持股唔會賣出住，但若下調至22,000至23,000點，就會踴躍買嘢，但係我不嬲唔信「國策概念」，仍會以價值投資嘅理念入貨，以選股為主。

經濟大師：美倘棄自貿全球輸

思：瑞銀資深獨立經濟顧問 麥理思（George Magnus）

彩兒：大師，依家個個望實美國，喺牛津教書嘅你點睇個經濟走勢？

思：美國可以話係全民就業，我估今年個GDP增長會介乎2至2.5%。如果特朗普肯減稅，甚至掟錢落去基建，GDP分分鐘升得仲快。但有一樣嘢都要提提你，如果喪普真係咁狠心，要同自由貿易「分手」，咁美國就會退下自由貿易世界的霸主寶座，咁嘅投資環境底下，個個都係輸家！不過，美國就輸少啲囉，你睇下其他國家，例如內地咁，其實仲係好倚重貿易，咁咪會輸得多啲。

喪普任命嘅官員得三種，一係就反內地，一係就保護主義，再唔係就保護主義得嚟又反內地，點搞呀？套用我哋嘅諺語，就係希望佢係吠多過咬，唔明？即係虛張聲勢呀，不過我就唔係咁樂觀……

華增信貸 人幣續跌

Kitty：咁一句到尾，今年會加息幾多次先？

思：老老實實，過去兩年都合共只加息兩次，如果今年經濟復甦夠快兼通脹達到目標2%，咁加息三次都好合理，甚至仲可以話係保守咗添。但如果經濟未如理想，莫講話加息三次，連兩次都冇得你加呀。

Kitty：你又點睇人仔走勢呀？

思：好難唔貶值喎，內地嘅信貸以每年20%的速度增長，當中包括全社會融資、非銀行金融機構債務同地方債。雖然，內地口口聲聲話要減信貸，又話收緊按揭同防走資，但實情係佢哋繼續增加信貸，咁人仔好難唔跌，大媽都好難唔走資喎。

彩兒、Kitty

若有料報畀彩兒同Kitty或有嘢問，可電郵money.biz@on.cc