絲絲講場：華為起「白宮」全球笑爆
依家位列全球智能手機出貨量第三嘅深圳華為，最近遇上件都幾頭痕嘅瘀事。絲絲鄭重聲明絕對唔係業務領嘢，而係公司使咗成百億人仔起好嘅深圳新園區，當中作為標誌建築嘅科研實驗室大樓，原來早喺幾個月前已經畀華為員工笑佢山寨美國白宮，點知近日呢單瘀事竟然畀外媒炒作嚟搞笑添！外界仲話，本來係個好機會向班西方企業晒冷，展示中國科技實力，點知就出事喇。
死撐反映國際化
早前呢幢華為科研實驗室大樓嘅外觀曝光，外形都叫歐陸式風格，但似乎外界唔Buy，啲評價一嚟就踩個大樓缺乏想像力，話同Apple四月入伙嘅太空船新總部，又或者同微軟搬入意大利米蘭新總部所在嘅Feltrinelli Building，嗰份空間感突出嘅現代建築理念相比，華為係醜出國際！
呢幢畀華為員工叫做山寨美國白宮嘅大樓，外媒仲用廿年前嘅深圳主題公園世界之窗嚟比較，仲話兩者一樣夠晒山寨。
呢個新園區佔地超過121.5萬平方米，估出年投入使用。今次畀外媒大彈，華為冇直接回應，亦冇透露邊個係建築師，只係話設計反映公司業務夠國際化。不過聽聞創辦人任正非好欣賞傳統歐洲建築風格，唔知佢有冇畀意見呢？
余絲韻