絲絲講場:宏利一姐自己份MPF甚堅

強積金(MPF)「投資難、回報低」係唔少打工仔嘅心聲,宏利人壽保險(國際)僱員福利業務部高級副總裁兼主管吳智珊(Luzia)帶領宏利MPF已經六年,Luzia平日都醒大家唔少MPF投資貼士,呢位「強積金女王」嘅MPF投資回報到底又係點嘅呢?

嗱,唔好嚇親!係35%!35%!葡萄吧。Luzia唔單止自己嘅MPF投資有道,宏利MPF喺佢帶領下表現都相當亮眼,截至一六年十二月底,以管理資產同現金淨流入計,宏利MPF都位列榜首。

內地客投保錄增長

講起內地「大媽」呢幾年成香港保險業增長動力之一,但內地資本管制愈來愈嚴,宏利人壽首席財務總監紀榮兆(Nigel)透露,一五年內地客佔宏利香港新業務約15%,而舊年相關佔比稍為增加,但Nigel就冇披露實際有幾多,只係話內地收緊措施會對業務有影響,惟仲需時觀察,日後宏利或者會研究新嘅繳費方法。

講起同行友邦香港早前致函私家醫生,指將釐清「醫療所需」住院手術嘅索償,引起軒然大波,宏利人壽首席行政總監萬士家話,宏利未打算改變住院索償慣常做法,但認為應加強教育市民,等大家明白部分手術其實可以喺門診進行,而且收費都會較低咁話。

不過呢,絲絲最想知MPF點投資先有35%回報,再向Luzia八吓先!

余絲韻