絲絲講場：財圈今日情歸何處？

鍾絳虹：普通工作天

有「新股女王」之稱嘅「單身貴族」中央證券董事總經理鍾絳虹，坦言：「我命運中冇桃花嘛，所以都冇情人！」原因係自己性格傾向做獨行俠，怕麻煩；又話唔羨慕嗰啲「女神」、「BB」喎！不過公司請咗好多「85後」，估計班後生會收到唔少花，自己都會戥佢哋開心，但對佢嚟講，今日只係一個「普通」星期二，會喺工作中度過。

黃德几送禮無上限

而結婚第八年、「愛妻號」金利豐證券研究部執行董事黃德几，都會「例行公事」慶祝，揀咗一間有紀念價值嘅尖沙咀五星級酒店食飯，之但係Dickie話想低調搞，所以同老婆講食普通飯算。（希望Dickie太太唔好咁早睇到呢篇報道啦！）

其實Dickie就一早送咗禮物，咁budget係幾多呢？Dickie就冇透露金額，總之冇上限，佢話：「講心唔講金，有心嘅天天都是情人節啦！」

東驥基金管理董事總經理龐寶林（Paul）離唔開送花同太太撐枱腳，不過絲絲更加關心佢囡囡前港姐亞軍龐卓欣（Ada）！佢話Ada已收到男友送花，咁大家就可以死咗條心喇！

余絲韻