內地大媽的北水湧住嚟，把我們個個餵到肥肥白白！這個是我於春節前預先叫大家入貨的劇本，果然眼下個市已經升到令媒體都紛紛拿出一五年「港股大時代」的行情來比較的地步。
內地基金要找配置同追業績，便從周一的內險，到周二還是內險，到周三的上晝是內房，下午就是券商，再到昨日就連內銀同船都炒。簡單點說，有人好急要貨！市場中夾雜住好多似是而非的以訛傳訛，包括養老金入市、中港債券通……全部都唔知係真定假！
不過，係真定係假重要咩？只要是真金白銀買上咪就得囉！周三有892億元，昨日再增至959億元！假如今日破千億元成交的話，仲唔係牛市七期？！
好多人對大市的成交破千億有戒心，認為是大戶出貨兼見頂之兆。其實我又唔話得你錯，事關去年九月，我無記錯恒指就係以破千億的成交見頂，到依家都未返上去。因此，今日我就同大家預測一下恒指有幾大可能於短期內見頂。
首先，我好肯定春節後的今浪小陽春，是同特朗普效應的終結，赴美的資金回流新興市場有關。你睇美匯指數於回落到100的邊緣之前，十二月的高位103已經是頂背馳。其次，市場把經濟刺激和通脹的預期入價而推高十年期國債的孳息，亦將要出現頭肩頂。人民幣的前景利彈，致使外匯儲備跌穿了3萬億美元但我們唔驚，因為明天會更好。
我早前預言恒指要上23,600點，於昨日已經達陣。短線而言，港股市底依然強，主因係水頭充足，不僅只係大媽的北水，仲有外資呢，全部都係推手。恒指連最短期的10日線都未失守的話，咪呃我話個市已見頂！
富昌金融研究部總監 譚朗蔚（作者為註冊持牌人士）