Market Insight：肉類股盈喜可短炒

周一市場憧憬被譽為「新國家隊」的中國養老金入市，中國人壽（02628）單日狂抽百分七，挾到好似細價股一樣，股市氣氛回升已是不爭事實。

補啲港交所實無衰

成交回升，顯示大戶入市積極度正在上升，值得留意，恒生AH股溢價指數連跌五日，昨跌至120左右，而喺資金取態方面，短期H優於A，兩者折讓逐漸收窄形勢明顯，溢價指數也朝着去年九月117.2的廿一個月新低方向走。

不論是養老金、大媽抑或內地莊家入市都好，近幾日另一市場明顯轉變，熱錢由獨沽一味托住兩、三隻指數權重藍籌，逐漸擴散到內險、內房、資訊科技、蘋果公司代工概念以至其他落後股仔身上，睇個勢後市唔似短癮格局。

即使無咩心水，古勝認為，補番多少可以受惠股市鑊氣回升的港交所（00388），應該都無個錯字。

綠地香港超殘博得過

近兩日見唔少跌跌不休，已經衰咗一排的股仔都翻生。古勝留意到一五年滬港通曾炒到出煙的綠地香港（00337），由周初的52周低1.63元，累積彈番一成八，昨日收報1.92元，不過對比「港股大時代」時高位8.6元，得番四分之一都唔夠，吸引到在下注意。

綠地搞開地產生意，一五年走去搞互聯網金融，氹得芬佬鬼死咁高興。港股癲峰期間仲以每股7.46元批股集資16.8億元，之後大插插，亦再無機會見家鄉。股價衰足咁耐，到周初內房股開車，先有機會趁勢死貓彈。

公司的地產生意唔算標青，但網絡金融在母公司照住之下，經已收支平衡有錢賺，食正內房兼沾到多少內地資訊科技炒作的古仔，超殘股價下，短期值得睇睇。

廣南燒冷灶要望多眼

舊年內地豬肉價格由低位回升，相關企業盈利改善，帶動股價向上。大家較為熟悉的應係萬洲國際（00288），集團有由美國進口豬肉，再喺內地銷售。該股舊年第一季尾至第二季初的表現相當突出，股價於十一月亦曾高見7.21元。

最近有兩隻豬肉股相繼發盈喜，上市三個多月的中糧肉食（01610）預計舊年全年盈利增長4.6倍，主因之一係內地能繁母豬存欄量下降，令豬價回升。至於廣南（集團）（01203）料去年純利按年增長逾六成，當中原因包括匯兌虧損減少，以及豬價處於高位。

呢隻股舊年全年都喺0.8至1元之間上落，昨日受盈喜消息帶動，開市已經彈高一成，收市升12%報1.1元，成交急增至近700萬元。究竟彈完能否再彈？咁就要睇吓今次人氣能夠維持到幾耐，因為以往交投都唔多活躍，而最近板塊的表現亦屬一般。

古勝