絲絲講場：財圈有份超筍工 做十年 年薪150萬
眨眼元宵都嚟緊，放完假未回魂唔想提返工？咁不如講搵工。金融行內有咩工，穩穩陣陣做10年有過百萬年薪？就係專門要確保啲金融機構與公司營運穩穩陣陣嘅合規（Compliance）部門。
定期審查財務資料
合規呢瓣做啲乜？除金融機構外，上市公司亦會設合規部門，定期審查啲財務資料、企業管治及內部監控是否達到水平；亦有另一種專審查營運操作，好似銷售方式是否符合要求。
香港金融發展局高級顧問李建英（Esmond）早兩日喺就業講座上，大講合規呢瓣近年「錢」途，「一般一入行月薪都有2萬蚊，有咗5、6年相關工作經驗，月薪可升到5萬、6萬。約10年升到副總裁級別，年薪可達100萬至150萬元。
倘若表現出色晉升至管理層，年薪250萬元都有可能」。佢仲話，呢個只係一般中型金融機構嘅行情，跨國大型金融機構嘅Package自然唔止咁。
Esmond又話，合規工作好穩定，近年好少聽到會裁減人手：「之但係美國總統特朗普或放寬金融業監管，可能會令合規行業環境有變。」
要有創意 注重細節
咪以為合規一味同公司Say No，話呢樣唔做得、嗰樣唔啱規矩。資產管理顧問公司貝萊德董事總經理杜國汶（Graham Turl）話，依家最吃香嘅合規人員，要有創意兼注重細節，識諗方法點幫公司喺符合法規與唔損害公司形象下，拓展業務。又知規矩又細心又有創意，咦，啱絲絲喎！
余絲韻