For Me族理財：龍友謀撈金融 月搵5萬

近年南韓潮講「For Me族」，指以自己理想為先，他們愛做兼職不做正職，以求空出更多時間享受人生及發展個人興趣，調查指近年愈來愈多香港年輕人沉醉「For Me族」生活。

曾全月零Job 食穀種

今期我們先訪問攝影師──莊紹基，朋友都叫他做「水基」，他24歲，為一名攝影發燒友，畢業後接Job過活，目前當產品及活動攝影師，月入逾二萬元。「我好鍾意做Freelance，有彈性返工時間，唔使跟公司規矩，正！」可以把興趣作為職業，確令人羨慕。

惟他唏噓地稱，做攝影師始終工時長、收入低且不穩定，跟其他工種較量，已輸在起薪點。「收入太唔穩定，我試過成個月無工開，要慳住用上個月剩番嘅糧。」

他更說，做藝術的亦容易被人取代。「我驚愈來愈多人識攝影，或者自己跟唔貼攝影最新潮流，最終會被人淘汰。再者，當攝影係你唯一搵錢工具，相對沉悶嘅工作也被迫接，我擔心他朝一日連攝影呢個興趣都會無埋。」他經常拍攝Event，因日薪吸引，「但同一場景相，會影到無晒樂趣。」

他銘記着某前輩的一席話，「若你做攝影係為咗搵錢，咁你就應該盡快放棄呢行。其他工種，收入仲多。」他認真考慮過前輩建議，決心轉行，並定下目標，三年內月薪逾五萬元。

他目前有意投身金融或地產行業，因看好行業前景，更說不介意起薪點低，會努力發奮，向財務自由邁進。要在理想與麵包之間作選擇，當前他斷言會選麵包，「要我放棄我嘅理想職業，坦白講，我老咗可能會後悔。」他是獨生子，自知遲早要成為家庭經濟支柱，擔起養家的責任，所以能否賺取穩定且高薪酬，是他選擇行業的主要考慮因素。

希望家人生活無憂

水基出身於小康之家，「由細到大，想要咩、想食咩，屋企人都會畀我。但慢慢發現，原來自己身在福中不知福，物質享受一直都比其他人高。」

中四被踢出校的他稱，年半前見年紀老邁的嫲嫲身體開始出現各種小毛病，所以決心要孝順她，找一份高薪厚職，令家人生活無憂。

他現在只求家人生活快樂，暫未着緊於成家立室。他指，「未係時候成家立室，收入咁唔穩定，銀行得萬幾蚊，要我再養多個人，我負擔唔嚟。」

「自由人」搵朝唔得晚 宜慳儉

水基當自由人近一年，銀行戶口僅得一萬多元。他不諱言，自己過去較「大使」，「我有幾多使幾多，所以無錢剩，自己亦好姿整，每月會花2,000至3,000元買護膚品。護膚唔慳得，因人靠衣裝，畀人哋嘅第一印象好緊要。」

學識記帳 量入為出

自他搬出與朋友分租葵涌一個住宅單位後，每人月租3,500元，日常開支大增，他開始有慳錢意識，「我少買咗衫褲鞋襪，平日夜晚亦會自己煮，日常使費大約3,000蚊。」

他決心要讓家人過好一點的生活，康宏理財服務聯席董事胡彥希勸喻，要懂節流，宜養成良好習慣，記低所有日常開支，再簡單分類，把水電煤、租金等歸納為必要開支，其餘個人開支則列入非必要開支，然後着手減少非必要開支。

他笑言，「學識記帳，邊度開支大咗，都會一清二楚。例如可能呢排多咗出街，使多咗，之後就要提自己慳啲，多啲喺屋企食。或見水電費貴咗，就應該提自己唔好長開燈，唔好沖咁耐涼。」

當自由人，最弊是沒有穩定收入，胡彥希指，無論是正職打工仔或自由人，都一定要預留備用錢，以備不時之需。自由人更要預留更多備用錢，宜儲夠六至九個月使費。

揸藍籌利短期套現

胡彥希曾建議一位從事廣告業的自由人，撥部分資金作備用錢，並開設戶口作固定儲蓄，以及彈性投資，令資產增值。「某啲藍籌股或債券基金，有得收息，又提供流動性，容許你手緊時，幾日內套現，好啱自由人。」

他更叮囑，雖自由人享彈性工作時間，但收入不穩定，要成功儲錢更要學懂紀律，知慳識儉，才可為將來的理財需要做好準備。