孖妹S檔案：盈喜與盈警 揀股有竅門

盈喜股：「係咪符預期」成關鍵

潘：亞洲創富證券行政總裁 潘鐵珊

姚：時富資產管理董事總經理 姚浩然

黃：晉裕環球資產管理投資研究部策略師 黃耀宗

彩兒：我最有印象係隻伊泰煤炭（03948）預告盈利增長21倍，報喜後第二日升幅超過一成；寶信汽車（01293）仲勁，報喜第二日升近兩成！你覺得仲追唔追得過？

潘：彩兒，因應大市未見大趨勢，所以買中盈喜股獲利先會好少少，皆因市況唔係一面倒做好，而係上落市，所以都係穩陣啲好喎！仲有啊，扭虧為盈嘅股份，預計盈利增長倍數咪會大囉，但我反而覺得，如果隻股可以連續2至3年有穩定盈利增長嘅話，咁就唔怕揸長啲喇！

姚：追盈喜股嘅重點在於，盈喜情況係咪符合市場預期，好過預期會升，差過預期會跌，而唔係單單睇盈利增長倍數嘅。另外，好似煤炭行業咁，之前成個行業環境都好差，令到業績基數低……再者，睇數據時又唔好咁片面，全年業績發盈喜又唔代表勢頭好，可能第一至第三季表現係好，第四季就表現一般呢？所以如果間公司有出開季度數據，就應該自己拎第四季度數據去同第三季或者同首三季比較吓。

資源股前景有保留

Kitty：好多隻資源股排住隊發盈喜，究竟係咪咁好景先？

姚：近期有好多資源股發盈喜，不過要留意，未必前景好，煤碳價格早前摸頂回調過，我諗今年都仲會落少少。至於水泥季節性因素大，就算鋼鐵價格繼續升都好，都仲要睇原材料價格會唔會繼續升，皆因鐵礦石價格又會跟住鋼鐵價格，所以其實前景受制於好多因素。

黃：其實啲資源股，尤其鋼鐵股，由上年第四季炒到依家，所以係時候要止止賺，反而應該等第二季，佢哋真係公布咗業績，出現反高潮、市場趁好消息出貨嗰陣先好買。

彩兒：唔追得報喜股，咁仲有乜玩法？

潘：寶信汽車業績好，我都唔會意外，其實內地一線汽車股我都睇好，好似和諧汽車（03836）、美東汽車（01268）咁，後者都已經發咗盈喜喇！值得留意嘅係，仲未有聲氣嘅永達汽車（03669）估計都即將發盈喜，顧及近期股價有突破，過去業績Keep住唔錯，喺汽車融資同售後服務方面強，又仍然開緊新店，所以值得留意。

華夏動漫勢強值博

黃：不過，我就對汽車股有保留，有啲懷疑係因為內地買家早前購車優惠就快完，所以急急腳買車而令汽車股有盈喜。

Kitty：科網股一向都係你愛股，唔會冇心水啩？

潘：華夏動漫（01566）之前買入世嘉旗下公司，由內地市場走向國際化，而且內地室內電玩巿場潛力巨大，勢推動華夏動漫盈利，我估計佢未來都有機會發盈喜，值得一博。

彩兒：華夏動漫旗下VR線下熱點數目超過1,000間，內地好多省市，好似深圳、廣州、上海呢啲大城市都有佢足迹，認真夠晒In……Oh Yeah！

中鐵吼實6.6元上車

Kitty：我都係鍾意啲認認真真、做實事嘅股份喎！

黃：Kitty，環保股同鐵路股啱唔啱你心水？之前環保股受累於人民幣貶值，就算有國策扶持都好，股價都碌咗落嚟，近期人仔企穩番，環保系走勢就上番嚟，我特別睇好隻北控水務集團（00371），佢同人仔相關系數有0.52，仲可以博佢之前賣遼寧水務股權，收益會做靚盤數，建議5.4元買入，上望6元，止蝕位5元。

黃：另外，我仲會睇好鐵路股，特別係隻中國中鐵（00390），舊年新簽合同多咗29%，又憧憬佢同中國鐵建（01186）合併，而且睇番圖表，由一五年中至今做咗個大圓底，可以6.6元買入，目標7.2元，止蝕6.2元。

盈警股：太快判死刑恐走寶

Kitty：唔少股友見到盈警股，就好似隻股份貼住「生人勿近」咁，其實又唔好咁快判死刑……

姚：係呀，就好似中國石油股份（00857）咁，雖然佢發咗盈警，但其實佢第四季業績唔差喎，所以唔可以單睇全年業績盈警就作實！

我認為，油價走勢會傾向穩定啲，主因石油輸出國組織減產協定有正面作用，油價如果保持現行價位，中石油營運就會有改善。不過該公司除咗產油，都仲有中、下游業務，以現時行業情況，我相信佢（業績）可以維持到升勢，即使佢市盈率未必可以滿足到投資者，但佢巿帳率（P/B）低於1倍，仍然有吸引力，考慮到佢之前升咗一輪，短線上望空間唔大，建議等6元樓下吸納。

中聯重科進取之選

彩兒：環球基建項目冚冚聲出台，帶挈相關股，有部分大型機械股已經報咗喜，就好似隻中國龍工 （03339）咁，但偏偏隻中聯重科（01157）就「報警」，真係冇佢符！

黃：中聯重科「報警」之後有急插過，之後就抽番上去，其實睇到成個板塊都已經轉勢，盈警只係反映過去經營情況啫……唔少成熟市場國家由貨幣政策走向財政政策，興建大型基建，環球大型機械需求慢慢增加，所以該股算係進取之選，3.7元買入，上望4.4元，止蝕位3.5元。

money.biz@on.cc

彩兒 Kitty