Market Insight：軟件股現價買得過

兩會已定於三月初開幕，以往A股炒會前國策，形成A股二月升多跌少，即傳統「二月效應」。上周五A股假後重開，成交淡靜下近day low埋單。本地魚缸唔好得去邊，炒兩會概念的煤炭、鋼鐵、建材及新能源股，唔少高開低走，到底係流年不利抑或今年「二月效應」唔靈，暫時無疑是言之尚早。

古勝認為有三個因素作怪，舊年美國大選後，中港股市失焦，資金今年早咗在兩會概念股身上部署，唔少一月中旬已經開車。另外，經歷一五年A股股災與粗暴救市，去年人仔匯災，人行托市托到唔湯唔水，外儲水瓜打狗，跌到落3萬億美元邊。以往個個認定阿爺的國策指揮棒在股市無所不能，經一事長一智，今日威力仲有冇咁勁，大家有眼睇。

兩會概念難瞓身炒

第三點，乃「侵侵」近排以破紀錄速度兌現選舉承諾，唯獨未來中美貿易關係點發展仲未明朗，最壞當然係發展到貿易戰。大孖沙即使想買，都務必停一停、諗一諗，最好等塵埃落定至算。陰霾一日未除，要瞓身落去炒兩會概念也實在是強人所難。

金蝶似開車追落後

事實可見，上周五美國非農就業數據又一次超額完成，加上「侵侵」對銀行監管可能鬆手，道指爆升，返回兩萬點樓上。反觀無論夜期、新加坡黑期同ADR計價，預示恒指都係升一百點鬆啲，三個因素下港股逢二進一，大升大跌無佢份的上落市要幾時至能夠打破缺口，天曉得！

舊經濟股唔少受制於中美不明朗形勢，芬佬想買而未敢買，反之中國網絡及資訊科技股純本土概念，近日反而能夠乘勢突圍。龍頭騰訊控股（00700）返到兩舊水樓上之後，見其他二線股已亦步亦趨，手遊、應用及雲端服務都不乏捧場客。

上周五見金蝶國際（00268）似想開車，一度破上月中高位3.06元。公司由聖誕前開始，在3元樓下密密回購，既然現水平同公司認定的抵買價相差唔遠，去年業績肯定谷底反彈的金蝶，呢個價位入得過。

龍頭醫藥股優勢明顯

內地醫療系統時常為人詬病，醫改細節逐步出台，加強規管不良營運手法，完善各方面的制度，病人福祉有望得到改善。

面對行業整頓，併購重組少不了，而規模大、資本實力雄厚的企業，理應有着數。醫藥股中，國藥控股（01099）無疑係龍頭之一，分銷網絡相當龐大，截至去年六月底，網絡覆蓋內地31個省、直轄市及自治區，包括逾一萬三千多間醫院、十萬間小規模終端客戶，以及逾七萬間零售藥店。基本上國藥有九成收入來自分銷業務，舊年分部收入按年增長近14%。

「互聯網+」概念亦應用喺醫藥行業上，早前出台有關完善藥品生產流通使用的文件中，就提到「互聯網+藥品流通」。有關當局指目前正在研究，因互聯網售藥不能完全開放，既要促進流通情況，亦要加強監管以保障大眾健康。

國藥上藥再試高位

上海醫藥（02607）近年布局電商業務，旗下上藥雲健康已與多個醫療機構展開合作，線上線下服務互相配合，若然中央未來加強對電商的支持，上藥應可受惠。國藥及上藥上周五逆市向上，分別升5.4%及3.7%，兩者股價均重上各平均線，交投亦見配合，後市有機再試高位。

古勝