於周三已經同大家講過，「侵侵」的「百日狂政」拖累恒指未能夠於雞年的首個交易日紅盤高開，認真係雞犬不寧，全球有排煩喇！民心唔歸服，於是乎政策唔通，呢個係理所當然的事。不過，你唔使為「侵侵」擔心呀，邊個唔聽話咪炒魷魚囉！
就因為咁，署理司法部長耶茨（Sally Yates）於日前就因為違抗行政指令而畀「侵侵」開除，成件事同我讀中學的時期歷史書入面個秦始皇有咩分別？聽人講，呢種暴君的行為係一種病態嚟！佢可能患有惡性自戀人格障礙症（Malignant Narcissism），吓唔係嘛？全球仲要畀佢玩多四年個喎！你話死唔死！
「侵侵」的表現令市場大失所望，咁就正中我下懷喇！上年底時有人問我：美匯指數於咩情況下先有可能見頂？我就答：「侵侵」上任。你望望個美匯，呢兩晚都收穿咗100樓下，簡單講，確認喇！咁係咪要驚呢？又唔係喎！正因美匯確認回落，離岸人民幣（CNH）先至有條件爆上！
CNH於我昨午執筆時報6.82，與一月六日的高位6.7889比較，兩者只不過咫尺之差！一旦CNH一下子抽爆呢個阻力位，再配合阿爺條南下的水喉於今日打番開，容乜易觸發恒指爆上o架？
我寫來寫去，只係想make sure我的粉絲唔好搞錯concept：美國佬走疲（只要唔係股災）係對我們港股有百利而無一害！發夢都要望「侵侵」倒瀉籮蟹呀！
最後，我想補多一句：農曆新年前我借本欄話丘鈦科技（01478）會於節後再升一成，已經應驗咗喇，6蚊gogogo！
富昌金融研究部總監 譚朗蔚（作者為註冊持牌人士，本人及客戶持有丘鈦）