絲絲講場：ETF之父8句投資智慧

ETF（交易所買賣基金）現今大行其道，被稱為「ETF之父」嘅全球最大互惠基金公司領航集團（Vanguard）創辦人博格爾（John Bogle），係現今地位最崇高投資界猛人之一。若遵照博格爾教導去投資，十至廿年回報應該係全球最頂尖嘅20%，以下係8句博格爾畢生智慧結晶。

1、「別要從草堆中把支針挑出來，索性買整堆草吧。」

【絲絲翻譯】與其請基金經理幫你喺金融市場發掘投資機會，倒不如直接投資指數基金吧。

2、「投資最殘酷最諷刺的是，（你請人幫你投資）所付出的一分錢，何止未必收回一分貨，甚至會收回一些你不想見到的結果。」

【絲絲翻譯】畀錢主動型策略基金經理幫你揸主意投資，肯定唔會「一分錢一分貨」，事關無論投資回報點，你都要畀管理費。

「少少啱 跟住唔好大錯」

3、「別相信市場上真的存在入貨或出貨信號，我投資近50年，未見過有人能持續成功低買高賣。」

【絲絲翻譯】你本來認定嗰個係「信號」，但睇住班人同一時間入貨或出貨，大市急插急升，你敢唔跟大隊？你又點知嗰個「信號」係咪過咗去？。所以捕捉時機最難係個人心理關口，要長期抵受得住呢種壓力？講就易。

4、「買指數基金是明智、踏實、輕鬆的投資方法，避免個股、板塊或基金經理能力等風險，要承受的風險只有大市本身。」

【絲絲翻譯】Well，佢身為「ETF之父」，當然賣花讚花香啦，要穩陣，應該要有一定比重嘅債券基金。

5、「投資非看來般困難，想成功，只要做少許對的事，避免嚴重失誤便行。」

【絲絲翻譯】嗰些少要做得啱嘅係乜？包括控制好情緒、戒貪戒懼、控制開支、適當分散投資、保持耐性、制訂長遠計劃、控制風險。知易行難，加油！

6、「時間是朋友，衝動是敵人。」

【絲絲翻譯】唔使譯，明啦。

「蝕20%會死?咪玩股票」

7、「光想像蝕20%就已經承受不了的，別玩股票了。」

【絲絲翻譯】其實20%都講少咗，○○至○九年間美股已經試過兩次跌逾50%（千禧年科網股「爆煲」，○八年金融海嘯），若你決心投資股票，就要預備承受股市嘅周期變化。

8、「若有人因沒認清事實真相而得到甜頭，便很難叫他再去認清事實，世事就是這樣奇怪。」

【絲絲翻譯】講白啲，證券銷售人員睇佣金份上，好自然會「忽略咗」提啲客產品有缺陷，亦會「唔記得」提供啲畀個客可以賺多啲（而佢會賺少咗）嘅選擇。你一次「盲樁樁」咁賺咗，亦好易會畀自己繼續盲落去。嗱，提咗你o架喇。

余絲韻