孖妹S檔案：吼準黑天鵝 投資Sure Win !

金：短期衝1241美元

盧：天王國際期貨首席策略師 盧楚仁

Kitty：想投資黃金其實有好多工具，如果想簡單啲，就可以揀黃金簿仔，叻啲重可以直接做期貨添！

盧：雖然金價不時會有些少調整，但係最近金價都可以維持喺1,220美元。美國總統特朗普正式上場，就搞好多嘢，證明佢參選時嘅政綱唔係靠嚇，係真係會做嘢，特別係佢之前亦有講到覺得美元太強，相信佢嚟緊會再做嘢去壓低美元。仲有，特朗普對華政策一旦實施，啲人就會搵地方泊錢，特別係最近有好多利好黃金嘅消息，所以到時金市就會受惠，金價就有機會爆升，我諗會喺短期內升穿1,241美元，後市亦會繼續升。

手頭有貨忌心急沽

彩兒：咁依家抵唔抵買啫？

盧：如果係投資者嘅話，依家值得吸納，但亦都可以睇定啲，因為金價會時不時回落，到時等佢回一回嘅時候買都得，但建議投資者唔好依家沽貨住，因為依家沽嘅話，風險會比較大。若果係想買嫁妝或者自用嘅話，就唔好等啦，更加要快啲去買，遲吓仲貴。

Kitty：我都諗住買啲雞年嘅金擺設，放喺屋企坐鎮，等啲親戚朋友嚟屋企探媽咪嗰陣，佢可以威吓！

彩兒：你買定對龍鳳鐲嚟做嫁妝仲實際啦！

股：大勢所趨資源必炒

蘇：招銀國際策略師 蘇沛豐（Daniel）

李：鼎成財富管理行政總裁 李明正

彩兒：依家個個開口埋口都講黑天鵝，我想食燒鵝得唔得？哈哈！

蘇：我覺得依家啲人濫用咗「黑天鵝」呢個Term，好似講番「大風險」好啲，近啲又比較大型嘅風險都係歐洲嗰邊，五月法國大選，關注歐盟有分裂嘅風險，法國總統選舉應該會轉番右派上台，問題係究竟會偏右定極右（分子）呢？

若然選咗極右上台，就會係一個極大嘅風險喇，可能會令法國搞脫歐，歐洲債務危機又會重燃，歐元匯價亦會波動，呢個係比較近嘅高風險因素。如果預期法國嗰邊有脫歐風險，歐元勢必大跌，一啲歐洲資產比較重嘅公司就要避開喇；一旦風險真係出現咗，成個市走勢向下，就可以趁低買番啲唔會受拋售拖累嘅股份……

李：個個都喺度講「逢七必死」，二○一七年會係波動嘅一年，環球現時有幾個大問題，主要係流動性問題，因為美國QE（量寬）咗好多年，依家啱啱去加息，嚟緊如果信貸收緊嘅話，借貸重嘅行業例如基建、建築等嘅影響就會較大，加息亦會利好金融、銀行業，今年主題係由債市轉股市，亞洲市場估值偏低，值得持有。股票方面，今年我比較睇好資源相關股票，皆因特朗普上場後，會有利能源、資源相關股份。

預加關稅 做定對沖

Kitty：法國大選有排先到，有冇啲係燒到埋身嘅先？Daniel唔好掛住湊B呀，記住提我哋呀。

蘇：如果係小型啲嘅（風險）就係特朗普嘅一啲政策，佢嘅對華政策，之前已經講咗要加關稅，雖然已經講到明，唔算係黑天鵝，但如果真係做，對港股會有震盪，但預計會加得溫和，之前講到加45%咁極端，都係想惹人注目啫。如果已有預期加關稅嘅話，就要做定對沖同防守嘅部署，或者用小部分錢買定黃金用嚟避險，同埋要避開直接受事件影響嘅股份，例如航運、碼頭等就特別敏感，會受累於中美貿易戰消息。

彩兒：我留意到資源股近期彈力幾足，好過我啲皮膚。

蘇：皆因近期資源股受惠於特朗普嘅基建項目，無論係煤炭、鋼、銅價格都齊齊破頂，加上唔少資源股接連發盈喜，我短線會比較睇好江西銅業股份（00358）。

李：近期水泥股勁升，估值已經偏高咗，其他資源股，好似傳統銅企江西銅、同埋有色金屬股中國有色金屬（08306）、仲有中國稀土（00769）等，係心水之選，主因睇到資金流向係走向資源、基建、同埋非必需消費品方面，所以相關資源同有色金屬需求勢增；稀土呢啲資源其實有好多戰略性公司會去爭，特別係軍工同高科技公司，所以睇好中國稀土前景。

定期重新平衡組合

Kitty：咁點入貨先至Fit？

李：其實近年恒指都徘徊喺18,000至22,000點之間，所以一旦有黑天鵝出現就跌穿20,000點係好合理，因應亞洲股市處於合理水平，所以每次出現黑天鵝後，市況一喘定就可以撈貨，相反美股不斷破頂，就唔建議去掂。其實散戶應該定期重新平衡投資組合，股份每升10%，就應將10%持股套現，控制風險。

蘇：若然係重磅股之中嘅騰訊控股（00700），受外圍事件影響極微嘅，一旦跟大市跌落嚟，就會係一個趁低吸納嘅機會，穩健投資者可分注買入，因為好難講一注買應該喺咩位買，好難估計事件有幾嚴重、市場反應又會係點。

匯：美元難跌Euro高危

李：寶華世紀資本市場執行副總裁 李焜明

彩兒：今年又揸乜嘢外幣穩陣呀？上年揸錯英鎊就真係大鑊！

李：我估嚟緊雞年歐洲應該至少有四隻黑天鵝，包括荷蘭、意大利、法國以及德國大選，可能最後選咗一個出乎意料嘅總統。其實由美國大選嘅時候，已經知道依家同過往10年已經唔同晒，依家社會再唔係咁保守，民眾希望有轉變，嚟個大突破，所以最後先會選咗特朗普。

日圓牛皮 料見116

Kitty：嘩！莫非你都覺得有黑天鵝出現？！

李：喺政治上出現黑天鵝唔出奇，但如果講經濟上，我諗今年黑天鵝就應該無乜，因為美國加息問題已經講咗好耐，低息時代已過，係時候要慢慢加番啲息先合理。另外，英國脫歐雖然仲係要經議會通過，但上年已經知要脫，所以亦毫無驚嚇，係歐洲某幾個大國唔想英國脫歐後攞「着數」，例如係關口稅項等。

彩兒：既然又會有異象，唔通真係美元最安全？

李：估計美元會喺呢大半年反覆向上，因製造業亦會做好，所以跌極有限，美匯指數應該會同依家差不多。歐洲方面，因為受大選及政治不明朗所影響，歐元兌美元應該會跌穿1算，英鎊兌美元亦會跌穿1.20。另外，日圓會比較牛皮，兌每美元預計會係108至116左右。

Kitty、彩兒