本文出街之日係大年初五，紅日過晒，又係時候開工。筆者借本欄祝粉絲們開工大吉，於新一年鴻圖大展，升職加薪，恭喜恭喜！
入正題，金融市場好興去呢樣、去嗰樣，呢時話去槓桿化，嗰時又話去產能、去庫存等。依家新鮮出爐的「侵侵」就搞出一個去監管來？到底係咩一回事？原來，佢老人家想削減對金融市場的監管，佢又特別提到《多德－弗蘭克法案》這一個被耶倫形容為最有效化解未來金融危機的重要法案。
打老太婆一記耳光事小呀，該法案其實是於奧巴馬任內對應金融海嘯而推出，用以限制衍生產品和銀行進行過度風險投資的良方。
今日這一記耳光，間接否定了奧巴馬於海嘯後實施的防衞工作，悲觀一點來說，是開啟下一次金融災難的大門，而不是如「侵侵」所講「條法案本身是災難」囉！
不過，我唔會怪「侵侵」，大家又唔係第一日識佢。佢的作風，用一句說話來概括就是「唔跟章法出牌」─無話一定失敗個喎！但就係前無古人的做法囉！最終是禍是福，就是用市場來做白老鼠去試試喇。
好似佢近日推行的移民新政咁，就因為限制了7個穆斯林佔多數人口的國家移民進入美國而搞到滿城風雨，最終導致多個機場出現了重大混亂，法律界和旅遊界的人士上街示威，到依家都未知點收科。而我最關心的道指就於周一跌了122點，創今年以來最大跌幅。
農曆新年前各位見恒指突破23,000點關都猛叫追Call（好在我都只係揸正股啫），唔知雞年個紅盤係咪凍過水呢？
富昌金融研究部總監 譚朗蔚（作者為註冊持牌人士）