理財常識知幾多？
要做大富翁，玩紙牌遊戲只是皮毛，到底小朋友的財智係咪超班，考吓就知。
Kody「有$100 會儲$50」
Q：做咗大富翁之後，你會做咩呢？
Kody：我會買大屋畀爸爸媽媽住，然後再買畀自己住，要買一間有七間房嘅屋畀爸爸媽媽。
Q：你估邊區啲樓最貴？
Kody：山頂，因為我去過山頂，嗰度風景好靚，所以我知道好貴。
Q：知唔知爸爸平時係做咩呢？
Kody：講股票，但唔知係做咩。
李偉傑：佢平時放學搭校車聽收音機聽到我嘅節目，所以會知道我係講股票。
Q：利是錢打算點用呀？
Kody：畀爸爸媽媽，然後佢哋會將佢放入銀行。如果我有100蚊，我會儲50蚊，但我唔知密碼，點攞呀？
Victoria想灣仔開紙巾舖
Q：平時爸爸媽媽有冇畀零用錢你呢？你會點用？
Victoria：有啊，我會儲起啲錢，之後我會睇吓啲嘢係咪好鍾意，我最近想買嗰啲有轆嘅鞋（暴走鞋）。
Q：你知唔知爸爸係做咩職業呢？
Victoria：爸爸係做「返工」，平時睇報紙或者雜誌，爸爸會問我邊個係佢？
林偉雄：（大笑）有人畀錢爸爸，希望可以將錢賺錢，好似大富翁咁，買一個地方，希望之後可以賺多啲錢。
Q：做咗大富翁之後，你要買乜？
Victoria：我會睇吓一間屋幾多錢。如果可以買到兩間屋，就可以一間屋畀自己同細佬，另一間畀爸爸媽媽住。另外，如果我成為大富翁，我會自己開舖，想賣紙巾，因為紙巾係必需品；我最想喺灣仔開舖，因為我見過嗰度冇咩賣紙巾嘅舖頭。
Ricardo與Natalie應使則使
Q：平時會唔會儲錢買嘢呢？
Natalie：我平時會儲錢買嘢，如果有一樣嘢我好想買，我會睇埋其他店舖，睇下邊間平啲，格價後才會買。
傅媽媽：平時沒有給他們零用錢，但如果他們默書，測驗得到不俗的分數，便能得到一些零用錢作獎勵，但一定會教他們「應使則使」，不要用盡一分一毫，一定要儲起一部分，慢慢儲錢，才買自己想買的東西。
Q：依家一層樓起碼要幾多錢？
Ricardo：我知道係400萬，因為平時同爺爺行街嘅時候見到啲舖，出面會有寫。
傅惠賢：（大笑）我一向知道囝囝觀察力強，但完全估唔到佢會知道地產行情。