Market Insight：重機股受惠資金追捧

今日半日市，如無意外可以企住高位跨越雞年，隨時會挾到收晒爐倉底空虛的芬佬，下周三復市焗住追貨，把握最後機會壓番多少倉底度年歲穩陣。

「侵侵」行事冇得估

近排唔少股市花生友，個個等住「侵侵」就任，押注美股好可能有反高潮。勢估唔到，牛皮的美股反過來三兩個箭步，一放絕塵，隔晚三大指數同日創出收市新高，上一次是上世紀一九九九年所發生，美股確係強到無朋友。

「侵侵」剛剛廢掉TPP，再嚟是美國放輕在聯合國的角色；至於以為係信口開河，走數機會九成九的美、墨邊境建牆，隔晚居然有下文，已經簽行政指令準備籌建，套用電影《食神》內的金句：「真係估佢唔到！」

大笨象博開齋穩膽

今日係港股雞年前最後半個交易日，「特朗普經濟學」睇嚟依然會左右環球股市局勢一段日子，狂人親商界之餘，同華爾街賓架仲攬頭攬頸，唔止一次講過上任後要放寛銀行業監管，既然荒誕到建牆的政綱都有着落，睇嚟大型銀行股仲係可以睇高一線，強勢仲未有耐到「頂」。

昨日隻大笨象滙豐控股（00005）股價最高見66.9元，同上月高位67.25元已是一步之遙。該股於近一個月在高位來個大圓底整固，以低位61.3元計，按此破頸線量度升幅可見73.2元。

要穩陣搵隻股壓年，博雞年第一擊即時開齋，滙控實在不作他選，更甚是港股衝破23,150點重要阻力後，長假後復市可衝幾遠，大笨象所擔當的角色，斷估係主角之一。

中聯重科業務漸入佳境

最近基建相關股備受追捧，重型機械股維持強勢。大摩及德銀均發表報告睇好中國龍工（03339），分別上調其目標價至2.9及2.05元，報告亦提及中聯重科（01157），其中大摩將其目標價調升近四成至4元。

機械需求改善

中聯重科的業務較廣泛，據舊年中期業績顯示，集團來自工程機械收入佔總收入41%，而環境加農業機械佔比合共近45%，前者收入倒退三成，後兩者有不俗增長，成為新的增長點。

中聯重科早前發盈警，惟未對股價構成太大影響，主要係盈警中提到一六年度業績錄得虧損，是由於上半年工程機械行業不景氣，下半年已改善且預計有盈利。現時資金持續流入追捧舊經濟股，相信板塊後市仍可獲得支持，假期後不妨望多兩眼。

古勝