絲絲講場：小米虎哥過檔fb大搞VR AR業務
小米海外業務副總裁「虎哥」（Hugo Barra）星期一呢頭喺facebook話為健康着想，農曆新年之後就會同小米分手，要離開北京返家鄉美國發展；轉頭尋日就喺fb自爆已經有落腳地。
邊度？咪係fb囉！佢會加盟fb，會Lead住一個包括Oculus業務在內嘅VR （虛擬實境）Team，大搞VR同AR（增強實境）業務。
朱仔投資30億美元
fb CEO朱克伯格尋日亦同時發貼，話同虎哥好夾，理念一致，相信移動領域中，下一個重要平台就係VR同AR，之前仲講過喺未來10年會投資30億美元推動添！
虎哥隨即留言話搞VR係佢夢想，急不及待想加入新Team！簡直就係未出發先興奮。硅谷氣候宜人又同聲同氣，梗係歸心似箭。話時話，佢仲用唔用「虎哥」呢個朵呢可？
余絲韻