北水頭等倉：江銅有勢挑戰高位

筆者早前已講過，新春前後港股能唔能夠向上試阻力位，要視乎騰訊（00700）生唔生性。果然QQ昨日已率先起動，股價升1.5%，收報200.8元，成交34億元，短線若能衝穿100日線201元，應有望再試破高位。

資源股輪流發力

此外，銀行股恒生銀行（00011）及渣打集團（02888）股價均創出52周新高，唔排除大媽愛股滙豐控股（00005）亦有勢挑戰52周高位67.25元，不妨望多兩眼。

中資股方面，傳統資源類股份表現仍堅挺。中國鋁業（02600）股價連抽第三棍，昨日成功抽穿4元關，收報4.08元，升4.3%。俄鋁（00486）亦升8.8%，中國宏橋（01378）升5.5%。炒家口中有句叫「爛銅爛鐵」即係銅、鐵股炒高炒低都好，多數表現同步，咁即係可以睇吓隻江西銅業（00358）。

江銅早前發盈喜，預計去年度淨利潤增長四至六成，主要受惠於黃金及白銀價格上升，加上公司不斷強化內部成本控制，挖潛增效。

其實，上季銅價升咗超過兩成，照計江銅季度表現可以更好，係咪受對沖表現影響，就要等公布年度業績先至知。

技術走勢上，江銅股價昨收報12.96元，上升0.9%，見到10日線一連抽穿20日及50日線，勢頭仍屬向好，短線股價若能以大成交突破去年十一月的高位13.12元，是浪料可叩14元關，回吐宜守穩10日線約12.14元樓上。

司慕渢