絲絲講場：財子新春團拜夠通氣

避開晒中西情人節

今年證券界新春團拜已經擇咗吉日，就係西方情人節前夕，即二月十三日舉行。情人節留番畀證券經紀啲情人，搞手真識做。

何止咁，再細心睇，今年正月十五元宵佳節係二月十一日，團拜連中、西方情人節都唔撞期，真係不得不讚春茗搞手夠晒細心、夠通氣！新春團拜係證券業界一年一度大事，歷屆都係由多個證券界組織聯合主辦，例牌喺香港交易所（00388）展覽廳舉行，港交所、證監會同政府代表都會畀面出席。

至於去年因反對上市監管架構改革而聲名大噪嘅上市公司商會，年年都「搶閘」開新春酒會，今年亦唔例外，已訂於二月七日（正月十一日）舉行。唔知證監會代表今年會唔會畀面出席呢個「派對」呢呵？

余絲韻