Market Insight：汽車股轉勢有得炒

電商都要脫虛入實

恒指昨跌48點報23,049點，成交唔夠六百億元，一副提早收爐格局，塘水滾塘魚市況，有鑊氣的股份變得更集中，好似阿里巴巴將銀泰商業（01833）正式收歸己用，脫虛入實。

古勝留意到中港兩地零售股生猛番唔少，李寧（02331）同特步國際（01368）成交幾對辦，尤其早兩日畀TPG減持的李寧，睇落接貨者非短癮之輩，昨升8仙，短期博升穿5.13元確認雙底爆升。

吉汽破位指日可待

近排陸續發盈喜的汽車股，昨日都相當醒神，即使今年低排減稅優惠縮咗，但整體行業已走出一四年及一五年的周期谷底。

獲多間中資行唱好，預料一六年的強勢會因為新車款受歡迎，銷售佳績延續跑贏整體車市的吉利汽車（00175），昨日收9.11元，同舊年十月的歷史高位9.2元僅一步之遙，睇見佢近排成交級級上，破位應是指日可待。

至於其他選擇，內地新能源車龍頭比亞迪股份（01211）近日表示，計劃在未來兩至三年內向美國出口電動客車，其股價今浪表現大落後，可予留意。

另外，剛踏入車款更新周期，一七年銷售及業績都被大行睇高一線的華晨中國（01114），亦係在下心水。

本地銀行股諗得過

國際銀行股近排成為焦點，滙豐控股（00005）及渣打集團（02888）表現不俗，前者昨日高見65元，收報64.95元，後者突破70元後，繼續高位徘徊。英國公投脫歐以來，英國相關企業前途未明，早幾日首相文翠珊表態確認「硬脫歐」，依家反而有清晰方向，對市場來說亦屬好事。

美國加息步伐加快，債息息差擴闊，唔單止有利上述兩股，本地銀行股都可留意。不少大行睇好未來本地銀行的淨息差有望回升。恒生銀行（00011）喺舊年六月低位127.6元展開升浪，至今累升兩成，昨微升0.1%收報152.9元，14日RSI為71，由於已進入超買區，慎防有回吐壓力。

繼舊年出售南洋商業銀行，中銀香港（02388）早前再賣集友銀行，惟未有刺激股價向上。不過，該行手頭現金充裕，唔知派息會唔會慷慨啲。另外，中銀日前公布與中國移動（00941）合作，加快拓展東南亞業務。該股已突破30元水平雙頂阻力，守於其上有望進一步向上。下個月係銀行股業績期，唔排除績前績後有炒作，不妨望多兩眼。

古勝