絲絲講場：銀行玩e啲 手機派e利是

話說滙豐同恒生齊齊宣布喺佢哋嘅P2P（個人對個人）App「轉帳易」，新加入「e利是」功能，只要對方有呢兩間銀行嘅戶口，而又有對方手機號碼（唔需要戶口號碼），就可通過瞬間轉帳方式派「e利是」畀對方，兼送上祝福語。唔使現兜兜，又包無「走數」。

有人話無裝App？唔識用？得，唔怕花兩分鐘教埋啲竅妙，總唔會冇手機啩。

●派幾多錢？除咗系統預設二十、五十、一百港元外，可選擇「其他」，小數點後兩個位都得，即係你可以揀派一仙利是，定玩「溫馨」畀五百二十元（普通話諧音「我愛你」）？任你揀。

●利是可以派幾大？整個「轉帳易」（包埋e利是在內）最高轉帳限額為連續兩日合共三千元（未計其他開支）。即係想派大利是，就要就住吓。

●系統有預設「祝福語」供派發者選擇，可以唔選擇，但就不能自訂。換言之想祝人「掂過碌蔗」、「減肥成功」恐怕不能。

問題係，派嗰位首要有滙豐或恒生戶口。若佢冇，咁你惟有算吧。

余絲韻