昨日估指數會先試100日線，再挑戰23,012點及23,076點的雙頂，話口未完，第一站已到岸。在騰訊控股（00700）、中國移動（00941）及中港地產股帶動下，恒指創兩個月高位，升190點收報22,935點，企在22,909點的100日線之上，即月期指依然交出近兩百點即市波幅，日市收22,974點，高水39點，成交8.2萬張。
散戶唔信，大戶唔肯跟，港股愈要升。指數已連升五日，大家以為氣勢如虹？實則恒指還未返回特朗普勝出大選當日港股早市的高位23,048點，現在不過是舊地重遊。
去年唔少中港基金搵唔到食，跑輸恒指及MSCI香港指數的佔市場大多數，年底的櫥窗粉飾都慳番，先會放任在低成交下，讓指數free fall，在聖誕假後做出21,488點的短期浪底。
港股還原基本步，重返兩萬三關後，再數上去，23,268點、23,631點、24,064點甚至24,364點都有阻力。筆者傾向相信港股仍處上落市，再追值博率唔高。又睇睇未來兩日雙頂是否強勢穿越，否則可能短線試做反手。事先講明，注碼一定要細，尾市見不低收不過夜。
John Mullen