Market Insight：科網股低位唔怕買

鋼鐵股業績改善

內地黑色金屬期貨再有炒作，鋼鐵股跑贏大市，馬鞍山鋼鐵（00323）及鞍鋼股份（00347）分別升6.2%及6.8%，主要憧憬中國鋼鐵將提高今年產能削減計劃，加上分析指近日鋼鐵廠上調鋼價，料行業整體有望扭虧為盈。中國建築（03311）去年達成合約額目標，昨股價大漲6.6%。高盛報告重申其「確認買入」評級，目標價15.3元，集團業務具PPP概念，訂單增長亦穩健，若回吐可守穩11元支持，不妨順勢收集。

市場氣氛雖見好轉，但整體大市缺乏方向，部分板塊如汽車股、內地零售股、工業股及石油化工股，炒完一轉就無力再上，動力似強還弱。而早前跌得多的板塊則輪流炒作，近日深港AH股、受樓市調控的內房股以及受美國加息因素困擾的本地地產股等均反彈。

內地科企佔盡地利

騰訊控股（00700）唔經唔覺由180元邊升至200元樓上，其他中小型科網股靜咗一排，亦有機會再獲市場關注。早前相關板塊捱沽，主要是深港通開車前市場過分憧憬，且「侵侵」當選美國總統後，市場轉投舊經濟股懷抱，拋售新經濟股所致。

不過，近日美股市場早已消化相關消息，納指連續四日破頂，而口口聲聲話要抵制中國的「侵侵」，未上任就會見阿里巴巴主席馬雲商討合作，盡顯其商人本色，情況並非想像中咁悲。

另外，中國科網市場一向封閉，facebook、Google多次想打入中國市場均不果，內地科企佔盡主場優勢，未來唔憂無生意，就算外圍環境點變，對板塊影響有限。昨日就有數據指出，中國去年遊戲產業收入超百億美元，較一五年按年大增四成，反映增長潛力仍大。

金軟現價可追入

港股市場的科網股中，金蝶國際（00268）、中軟國際（00354）去年上半年分別多賺47%及69%，同期科通芯城（00400）純利亦升22%，至於金山軟件（03888）第三季純利錄得近兩倍的增長，業績表現理想，近日股價均正由低位反彈，現價追入有一定值博率。

霧霾嚴重醫藥股起舞

霧霾天氣由華東、廣州殺到落嚟香港，昨日遠望開始灰茫茫一片，古勝終感同身受。

中國政府揚言要同環境污染宣戰，霧霾問題卻未有絲毫改善迹象，兼且仲一年差過一年。煤炭業去產能，大力推動潔淨能源，再向電動車重手補貼統統都無用，近日搞笑到有城市以治霾為由，禁止餐廳炒菜。

其實睇番逢北京開大會，好似兩年前APEC，一搞企業停工，礦井限產即刻就有藍天白雲，可見問題是追趕GDP目標，抑或減霾問題迫切啲。

難怪霧霾一起，醫藥股炒到飛起，專家話霧霾下生活會引發呼級道疾病，但點都好，口罩已成為市民外出必需，難怪一直拉牛上樹的國藥控股（01099）近排精壯非常，由去年底低位31.2元衝返上36.15元收市。

集團首三季業績升兩成六，預期市盈率十七、八倍，短期係就係升得急咗，但如果有機會返到35元附近，實在諗得過。

內地下半年召開十九大，國藥一類的醫藥股龍頭斷估都唔會衰得去邊，近排見基金盤密密吸，可以留意。

古勝