絲絲講場：公司上市 老闆娘晒「蝠」氣
尋日三隻新股首日掛牌，各有吸睛處。
先係煜榮集團（01536）主席太太梁寧件鮮藍色蝙蝠褸，布滿海浪騰雲刺繡，仲繡埋蝙蝠寓意「福氣」，離遠望到唔止搶眼，直頭係霸氣！
太平洋酒吧主席同場鬥搶
太平洋酒吧（08432）主席謝熒倩件藍色裙一樣咁搶，唔通今年藍色旺場？佢哋送畀港交所嘅紀念品係大大個嘅琉璃杯，總之夠大。咦，仲有個後生女同謝主席一齊敲鑼？原來係佢哋酒吧分店經理陳婷，佢○九年由兼職侍應開始做起，依家二十七歲已經做到公司管理層，負責店舖日常營運、調配員工、員工培訓及執行銷售計劃。後生可畏！
至於做財經印刷嘅HM INTL HLDGS（08416）好似好低調，睇頭實情喺股價度，尋日開市後飆升過十二點九六倍，都咪話唔搶眼。
余絲韻