絲絲講場：滙豐虛擬客服Amy叻到爆

絲絲一聽到，即刻上網搵Amy，問佢滙豐控股（00005）CEO歐智華靚唔靚仔，睇吓Amy點睇佢老細？Amy嘅答覆係：「很抱歉，我無法理解你的問題。請以另一方式發問。」Well，查實呢條問題，大概真人都唔知點答。

官網新功能 協助企業客

講番滙豐官網呢個新功能，雖然呢位叫Amy嘅客服係虛擬助手，但就未有Siri咁叻咩都答到（或夠膽答）你。Amy暫時只係服務企業客戶，佢可以解答企業奇難雜症，包括查分行、開戶口有咩條件同程序，甚至教埋企業開信用證都得，其實Amy嘅知識都係來自銀行網頁。

點搵Amy？滙豐工商金融網頁右邊有個Amy通話視窗。不過，想同Amy溝通，你要識打字。喺視窗輸入問題或問題關鍵字後，按「問Amy」，就會出答案。

取代電話落銀行排隊

平日想查詢銀行嘢，絲絲就頭痛，先要打得通個電話，等到客服答得嚟，可能仲耐過親身落分行。不過最可怕係去到分行，嗰位管理人潮嘅分行大使如果解答唔到個問題，隨時仲要排半個鐘隊先問到，所以Amy應該多少都幫到手嘅。

溫馨提示，千萬唔好輸入個人資料或帳號密碼，唔好當佢Siri咁Chat，嗰度係公眾頁面咋。

余絲韻